അഹമ്മദാബ്: ഗുജറാത്തിലെ അഹമ്മാദാബാദ് വിമാനത്താവളത്തിന് സമീപം വന് വിമാനദുരന്തം. എയര് ഇന്ത്യ വിമാനം ജനവാസമേഖലയില് തകര്ന്നുവീണു. 242യാത്രക്കാരുമായി ലണ്ടനിലേക്ക് പുറപ്പെട്ട എയര് ഇന്ത്യയുടെ വിമാനമാണ് തകര്ന്ന് വീണത്. ഉച്ചയ്ക്ക് ഒന്നരയോടെയാണ് സംഭവം. ടേക്ക് ഓഫിനിടെയാണ് വിമാനം തകര്ന്നത്.
ടേക്ക് ഓഫ് ചെയ്ത് മിനിറ്റിനുള്ളില് വിമാനം തകര്ന്നുവീഴുകയായിരുന്നു. വിമാനത്തിന്റെ മിക്ക ഭാഗങ്ങളും കത്തിയമര്ന്നു. അപകടകാരണം ഇതുവരെ വ്യക്തമായിട്ടില്ല. പറന്നുയര്ന്ന് ഒരുമിനിറ്റിനുള്ളില് 625 അടി ഉയര്ത്തില്വെച്ചാണ് സിഗ്നല് നഷ്ടമായതെന്ന് ഫ്ലൈറ്റ് റഡാര് വിവരങ്ങള് വ്യക്തമാക്കുന്നു.
ജനവാസ മേഖലയായ മേഘാനി പ്രദേശത്താണ് വിമാനം തകര്ന്നുവീണത്. അഹമ്മദാബാദിലെ സര്ദാര് വല്ലഭായ് പട്ടേല് അന്താരാഷ്ട്ര വിമാനത്താവളത്തില് നിന്ന് ലണ്ടനിലെ ഗാറ്റ് വിക്ക് എയര്പോര്ട്ടിലേക്ക് പറന്നുയര്ന്ന എയര് ഇന്ത്യയുടെ ബോയിംഗ് 787-8 ഡ്രീംലൈനര് വിമാനമാണ് അപകടത്തില്പ്പെട്ടത്. വിമാനത്തില് 250ഓളം യാത്രക്കാരുണ്ടെന്നാണ് പ്രാഥമിക വിവരങ്ങള്. 300 യാത്രക്കാരെ വഹിക്കാന് ശേഷിയുണ്ടായിരുന്ന വിമാനമാണ് തകര്ന്നത്. ദീര്ഘദൂര യാത്രയ്ക്കായി വിമാനത്തില് വലിയ അളവില് ഇന്ധനം നിറച്ചിരുന്നുവെന്നും ഇത് അപകടത്തെ തുടര്ന്നുണ്ടായ സ്ഫോടനത്തിന്റെയും തീപിടുത്തത്തിന്റെയും തീവ്രത വര്ദ്ധിപ്പിച്ചിട്ടുണ്ടെന്നും മാധ്യമങ്ങള് റിപ്പോര്ട്ട് ചെയ്തു. രക്ഷാപ്രവര്ത്തനങ്ങള്ക്കായി ഒന്നിലധികം ഫയര് എഞ്ചിനുകളും ആംബുലന്സുകളും അപകടസ്ഥലത്തേക്ക് അയച്ചിട്ടുണ്ട്.
അതേസമയം മരണസംഖ്യ സംബന്ധിച്ച് നിലവില് ഔദ്യോഗിക സ്ഥിരീകരണമില്ല. ബോയിംഗില് നിന്നുള്ള സംഘത്തോടൊപ്പം ഡയറക്ടറേറ്റ് ജനറല് ഓഫ് സിവില് ഏവിയേഷന് (ഡിജിസിഎ) ഔപചാരിക അന്വേഷണം ആരംഭിക്കും. അതേസമയം, അപകടത്തിന്റെ സംശയാസ്പദമായ കാരണത്തെക്കുറിച്ച് ഉദ്യോഗസ്ഥര് ഇതുവരെ ഒരു പ്രസ്താവനയും പുറത്തിറക്കിയിട്ടില്ല.
കൂടുതല് വാര്ത്തകള്ക്കും തൊഴിലവസരങ്ങള്ക്കും ഗള്ഫ് വാര്ത്തകള് ഗ്രൂപ്പില് ജോയിന് ചെയ്യുക – https://chat.whatsapp.com/DEUubIBAkhI9HFrIvyQtal
വാട്സ്ആപ്പ് ചാനല് ലിങ്ക്- https://whatsapp.com/channel/0029VagTUieB4hdXiUEnVF1K
