തിരുവനന്തപുരം: നവകേരള യാത്രയ്ക്കിടെ ആലപ്പുഴയില് യൂത്ത് കോണ്ഗ്രസ് നേതാക്കളെ മര്ദ്ദിച്ച മുന് മുഖ്യമന്ത്രിയുടെ സുരക്ഷാ ഉദ്യോഗസ്ഥരെ സസ്പെന്ഡ് ചെയ്തു. മുന് മുഖ്യമന്ത്രി പിണറായി വിജയന്റെ ഗണ്മാന്മാരായ അഞ്ച് പൊലീസുകാരെയാണ് സസ്പെന്ഡ് ചെയ്തത്. പൊലീസ് മേധാവി സസ്പെന്ഷന് ഉത്തരവിറക്കി. ഗണ്മാന് അനില്, എസ്കോര്ട്ട് പൊലീസുകാരായ അരുണ്, വിപിന്, ഷൈജു, സന്ദീപ് എന്നിവരെയാണ് സസ്പെന്റ് ചെയ്തത്. ഇവര് സ്പെഷല് ബ്രാഞ്ചിന് കീഴിലാണ് ജോലിയെടുക്കുന്നത്. സുരക്ഷാ ഉദ്യോഗസ്ഥര് അന്യായമായി ആയുധം ഉപയോഗിച്ച് ആക്രമിച്ചെന്നായിരുന്നു എസ്ഐടി റിപ്പോര്ട്ട്. ഈ വകുപ്പും അഞ്ച് പേര്ക്കെതിരെ ചുമത്തും.
പിണറായി വിജയന് മുഖ്യമന്ത്രിയായിരിക്കെ നടത്തിയ നവകേരള യാത്രയ്ക്കിടെ ആലപ്പുഴയില് വെച്ച് കരിങ്കൊടി കാണിച്ച പ്രവര്ത്തകരെ ഗണ്മാന്മാരായ അനില് കുമാറും സന്ദീപ് എസും ചേര്ന്ന് മര്ദ്ദിക്കുകയായിരുന്നു. 2023 ഡിസംബറിലാണ് സംഭവമുണ്ടായത്. ഇതിന്റെ ദൃശ്യങ്ങളും പുറത്ത് വന്നിരുന്നു. മുഖ്യമന്ത്രിയുടെ അകമ്പടി വാഹനത്തില് നിന്നിറങ്ങിവന്നാണ് ഗണ്മാന്മാര് പ്രതിഷേധക്കാരെ മര്ദ്ദിച്ചത്. മുഖ്യമന്ത്രിയുടെ സുരക്ഷ ഉറപ്പാക്കുക മാത്രമാണ് ഗണ്മാന്മാര് ചെയ്തതെന്നും, അത് ഒരു ‘രക്ഷാപ്രവര്ത്തന’മാണെന്നും പറഞ്ഞ് മുഖ്യമന്ത്രി ഗണ്മാന്മാരുടെ നടപടിയെ ന്യായീകരിക്കുകയാണുണ്ടായത്. ഇതില് കോണ്ഗ്രസ് നേതാക്കള് വലിയ പ്രതിഷേധമുയര്ത്തി. പൊലീസ് നടപടിയെടുക്കാതിരുന്നതിനെ തുടര്ന്ന്, മര്ദ്ദനമേറ്റ യൂത്ത് കോണ്ഗ്രസ് നേതാക്കള് കോടതിയെ സമീപിച്ചു. തുടര്ന്ന് കോടതി നിര്ദ്ദേശപ്രകാരം ഗണ്മാന്മാര്ക്കെതിരെ പൊലീസ് കേസെടുക്കുകയായിരുന്നു.
കൂടുതല് വാര്ത്തകള്ക്കും തൊഴിലവസരങ്ങള്ക്കും ഗള്ഫ് മലയാളി വാര്ത്താ ഗ്രൂപ്പില് ജോയിന് ചെയ്യുക – https://chat.whatsapp.com/BEtoiocklOc8D5XDkdaHoR?mode=hq2tcla
വാട്സ്ആപ്പ് ചാനല് ലിങ്ക്- https://whatsapp.com/channel/0029VagTUieB4hdXiUEnVF1K
former Kerala Chief Minister Pinaryi Vijayans 5 gunman suspended in the case of beating youth congress workers during navakerala sadass in alappuzha district
