കുവൈത്ത് സിറ്റി: കുവൈത്തിൽ ഇന്ത്യൻ സർവകലാശാലകളുടെ ക്യാംപസുകൾ തുറക്കാനുള്ള ചർച്ചകൾ പുരോഗമിക്കുന്നു. നാഷണൽ ബ്യൂറോ ഫോർ അക്കാദമിക് അക്രഡിറ്റേഷൻ ആൻഡ് എജ്യൂക്കേഷൻ ക്വാളിറ്റി അഷ്വറൻസ് (എൻബിഎക്യൂ) പട്ടികയിൽ ഇന്ത്യൻ സർവകലാശാലകൾക്ക് അക്രഡിറ്റേഷൻ ലഭിക്കുന്നതിനുള്ള നടപടികളും അതിവേഗ പാതയിലെന്ന് കുവൈത്തിലെ ഇന്ത്യൻ അംബാസഡർ അറിയിച്ചു.
ഇന്ത്യൻ പ്രധാനമന്ത്രി നരേന്ദ്ര മോദിയുടെ കുവൈത്ത് സന്ദർശനത്തിന് ശേഷമുണ്ടായ പുരോഗതികൾ സംബന്ധിച്ച് നടത്തിയ വാർത്താസമ്മേളനത്തിലാണ് അദ്ദേഹം ഇക്കാര്യങ്ങൾ വിശദമാക്കിയത്. കുവൈത്തിൽ ഇന്ത്യൻ സർവകലാശാലകളുടെ ക്യാംപസുകൾ തുറക്കുന്നത് മാത്രമല്ല സുഷമ സ്വരാജ് ഫോറിൻ സർവീസ് ഇൻസ്റ്റിറ്റ്യൂട്ടിന്റെ ഭാഗമായി കുവൈത്തിലെ നയതന്ത്രജ്ഞർക്ക് ഇന്ത്യൻ ഫോറിൻ സർവീസ് അക്കാദമിയിൽ പരിശീലനം നൽകുന്നതിനുളള നടപടികളും ചർച്ചയിലാണെന്നും അംബാസഡർ വിശദമാക്കി.
ആരോഗ്യ മേഖലയിൽ, പ്രത്യേകിച്ചും രാജ്യത്തെ ഇന്ത്യൻ ഫാർമസ്യൂട്ടിക്കൽ ഫാക്ടറികളുടെയും ആശുപത്രികളുടെയും കാര്യത്തിൽ കൂടുതൽ പങ്കാളിത്തവും തേടുന്നുണ്ട്. നാല് പതിറ്റാണ്ടുകൾക്ക് ശേഷമുള്ള ഇന്ത്യൻ പ്രധാനമന്ത്രിയുടെ കുവൈത്ത് സന്ദർശനം ഇരു രാജ്യങ്ങളും തമ്മിലുളള ആഴമേറിയ ബന്ധം പ്രതിഫലിപ്പിക്കുക മാത്രമല്ല സുപ്രധാന മേഖലകളിലുള്ള സഹകരണം ശക്തിപ്പെടുത്തുക കൂടിയാണ് ചെയ്തതെന്ന് അംബാസഡർ ചൂണ്ടിക്കാട്ടി. ഇരു രാജ്യങ്ങളും തമ്മിലുള്ള ഉഭയകക്ഷി ബന്ധത്തിന്റെ കാര്യത്തിലും കൂടുതൽ സഹകരണം ഉറപ്പാക്കിയിട്ടുണ്ട്. ജിസിസിയുമായി സ്വതന്ത്ര വ്യാപാരത്തിനുള്ള ചർച്ചകൾ പുരോഗതിയിലാണ്. ഭക്ഷ്യ സുരക്ഷ, നിക്ഷേപം, പ്രതിരോധം, വിദ്യാഭ്യാസം, സംസ്കാരം, സാങ്കേതിക വിദ്യ എന്നീ രംഗങ്ങളിൽ സഹകരണം ശക്തിപ്പെടുത്താൻ ലക്ഷ്യമിട്ട് 7 പുതിയ ജോയിന്റ് വർക്കിങ് ഗ്രൂപ്പുകളും രൂപീകരിച്ചിട്ടുണ്ടെന്നും അദ്ദേഹം പറഞ്ഞു.
കൂടുതൽ വാർത്തകൾക്കും തൊഴിൽ അവസരങ്ങൾക്കും ഗൾഫ് വാർത്തകൾ ഗ്രൂപ്പിൽ ജോയിൻ ചെയ്യുക-
https://chat.whatsapp.com/Iz8594zylUiGUCaltFYrr7
ഗൾഫ് വാർത്തകൾ വാട്സ്ആപ്പ് ചാനൽ ലിങ്ക്-https://whatsapp.com/channel/0029VagTUieB4hdXiUEnVF1K
