ന്യൂയോര്ക്ക്: മുന് അമേരിക്കന് പ്രസിഡന്റ് ജോ ബൈഡന് (82) പ്രോസ്റ്റെറ്റ് കാന്സര് സ്ഥിരീകരിച്ചു. ജാ ബൈഡന്റെ ഓഫീസ് നല്കിയ പ്രസ്താവനയില് ആണ് രോഗവിവരം സ്ഥിരീകരിച്ചത്. രോഗം അസ്ഥികളിലേക്ക് പടര്ന്നതായും അദ്ദേഹത്തിന്റെ ഓഫീസ് ഞായറാഴ്ച പുറത്തിറക്കിയ പ്രസ്താവനയില് പറഞ്ഞു. മൂത്ര സംബന്ധമായ രോഗ ലക്ഷണങ്ങള് കണ്ടതിനെ തുടര്ന്ന് കഴിഞ്ഞ ആഴ്ചയാണ് ജോ ബൈഡന് ഡോക്ടറെ കണ്ടത്. ഇതിന് പിന്നാലെ വെള്ളിയാഴ്ചയാണ് പ്രോസ്റ്റെറ്റ് കാന്സര് രോഗം സ്ഥിരീകരിച്ചത്.
വളരെ വേഗത്തില് പടരുന്ന വിഭാഗത്തിലുള്ള പ്രോസ്റ്റേറ്റ് കാന്സറാണ് ബെഡന് സ്ഥിരീകരിച്ചിട്ടുള്ളത്. രോഗാവസ്ഥ വളരെ രൂക്ഷമായ നിലയിലാണെന്ന് വിശദമാക്കുന്നതിനായുള്ള 10 ല് 9 എന്ന ഗ്ലീസണ് സ്കോറിലാണ് രോഗാവസ്ഥ. കാന്സര് കോശങ്ങള് അതിവേഗം വ്യാപിക്കുന്നതായാണ് കാന്സര് ഗവേഷണ കേന്ദ്രം വിശദമാക്കുന്നതെന്നാണ് ബിബിസി റിപ്പോര്ട്ട് ചെയ്യുന്നത്. അതേസമയം ബൈഡനും കുടുംബവും ചികിത്സാ സാധ്യതകളേക്കുറിച്ച് വിലയിരുത്തുകയാണെന്നാണ് റിപ്പോര്ട്ട്. രോഗബാധ ഹോര്മോണുകളെ ആശ്രയിച്ചായതിനാല് നിയന്ത്രണ വിധേയമാക്കാമെന്ന സൂചനയാണ് ബൈഡന്റെ ഓഫീസ് വിശദമാക്കുന്നത്.
2024ലെ അമേരിക്കന് പ്രസിഡന്റ് തിരഞ്ഞെടുപ്പില് നിന്ന് ബൈഡന് പിന്മാറാന് നിര്ബന്ധിതനായി ഒരു വര്ഷം കഴിയുമ്പോഴാണ് കാന്സര് ബാധ സംബന്ധിയായ വിവരം പറത്ത് വരുന്നത്. ആരോഗ്യത്തേയും പ്രായത്തേയും കുറിച്ചുള്ള ആശങ്കകള് വര്ധിച്ചതിന് പിന്നാലെയാണ് ബൈഡന് പ്രസിഡന്റ് മത്സരത്തില് നിന്ന് പിന്മാറേണ്ടി വന്നത്. അമേരിക്കന് പ്രസിഡന്റ് പദവ് വഹിച്ച ഏറ്റവും പ്രായമേറിയ വ്യക്തിയും ബൈഡനാണ്.
പുരുഷന്മാരില് എറ്റവും സാധാരണമായി കാണുന്ന കാന്സര് ബാധയില് രണ്ടാം സ്ഥാനമാണ് പ്രോസ്റ്റേറ്റ് കാന്സറിനുള്ളത്. 100ല് 13 പുരുഷന്മാര്ക്കും അവരുടെ ജീവിതത്തിന്റെ ഏതെങ്കിലുമൊരു ഘട്ടത്തില് ഈ കാന്സര് നേിടേണ്ടി വരുന്നതായാണ് അമേരിക്കയിലെ കണക്കുകളെ ഉദ്ധരിച്ച് ബിബിസി റിപ്പോര്ട്ട് ചെയ്യുന്നത്.
കൂടുതല് വാര്ത്തകള്ക്കും തൊഴിലവസരങ്ങള്ക്കും ഗള്ഫ് വാര്ത്തകള് ഗ്രൂപ്പില് ജോയിന് ചെയ്യുക- https://chat.whatsapp.com/DEUubIBAkhI9HFrIvyQtal
വാട്സ്ആപ്പ് ചാനല് ലിങ്ക്- https://whatsapp.com/channel/0029VagTUieB4hdXiUEnVF1K
