ഡല്ഹി: ഡല്ഹിയില് എത്തിയ ഖത്തര് അമീര് ഷെയ്ഖ് തമീം ബിന് ഹമദ് അല്താനിയും പ്രധാനമന്ത്രി നരേന്ദ്ര മോദിയും തമ്മില് കൂടിക്കാഴ്ച നടത്തി. ഇന്ത്യന് സമയം ഇന്ന് ഉച്ചയ്ക്ക് പന്ത്രണ്ടിന് ഹൈദരാബാദ് ഹൗസിലായിരുന്നു കൂടിക്കാഴ്ച. ചര്ച്ചയില് ഇന്ത്യ- ഖത്തര് ബന്ധം തന്ത്രപധാന ബന്ധമായി ഉയര്ത്താന് ധാരണയായി. ഇതു സംബന്ധിച്ച കരാറില് ഇരു നേതാക്കളുടെയും സാന്നിധ്യത്തില് ഖത്തര് പ്രധാനമന്ത്രി മൊഹമ്മദ് ബിന് അബ്ദുള്റഹ്മാന് ബിന് ജാസിം അല് താനിയും വിദേശകാര്യമന്ത്രി എസ് ജയശങ്കറും ഒപ്പു വച്ചു. ഇരട്ട നികുതി ഒഴിവാക്കാനുള്ള കരാറുകളിലും ഇരു രാജ്യങ്ങളും ഒപ്പിട്ടു. ഖത്തറില് നിന്ന് ഇന്ത്യ കൂടുതല് പ്രകൃതി വാതകം വാങ്ങാനും ധാരണയായി. വധശിക്ഷ റദ്ദാക്കിയെങ്കിലും ഇനിയും ഇന്ത്യയിലേക്ക് മടങ്ങാനാകാതെ ഖത്തറില് തുടരുന്ന മുന് നാവികസേന ഉദ്യോഗസ്ഥന്റെ കാര്യവും ചര്ച്ചയായെന്നാണ് സൂചന. ഇന്ത്യയിലെയും ഖത്തറിലെയും വ്യവസായികളുമായും അമീര് കൂടിക്കാഴ്ച നടത്തി.
രണ്ട് ദിവസത്തെ സന്ദര്ശനത്തിനായി ഇന്നലെ ഇന്ത്യയില് എത്തിയ ഖത്തര് അമീറിനെ പ്രോട്ടോക്കോള് മാറ്റിവച്ച് വിമാനത്താവളത്തില് നേരിട്ടെത്തി നരേന്ദ്ര മോദി സ്വീകരിച്ചിരുന്നു. ഇന്ന് രാവിലെ അമീറിന് രാഷ്ട്രപതി ഭവനില് ആചാരപരമായ വരവേല്പ്പും നല്കി. രാഷ്ട്രപതിയുമായുള്ള ചര്ച്ചയ്ക്ക് ശേഷം അമീര് രാത്രി എട്ടരയ്ക്ക് മടങ്ങും.
കൂടുതല് വാര്ത്തകള്ക്കും തൊഴില് അവസരങ്ങള്ക്കും ഗള്ഫ് വാര്ത്തകള് ഗ്രൂപ്പില് ജോയിന് ചെയ്യുക- https://chat.whatsapp.com/Iz8594zylUiGUCaltFYrr7
ഗള്ഫ് വാര്ത്തകള് വാട്സ്ആപ്പ് ചാനല് ലിങ്ക്- https://whatsapp.com/channel/0029VagTUieB4hdXiUEnVF1K
