ടെഹ്റാന്: യെമനിലെ ജയിലില് കഴിയുന്ന മലയാളി നഴ്സ് നിമിഷ പ്രിയയുടെ മോചനത്തില് ഇടപെടുന്നതായി ഇറാന് സ്ഥിരീകരിച്ചു. ഇക്കാര്യത്തില് യെമനുമായി ചര്ച്ചകള് നടക്കുന്നുണ്ടെന്നും ഇറാന് വിദേശകാര്യ മന്ത്രി അറിയിച്ചു. നിമിഷപ്രിയയുടെ മോചനത്തിനായി ഇറാന് ഇടപെടുന്നുവെന്ന് സ്ഥിരീകരിക്കാത്ത റിപ്പോര്ട്ട് നേരത്തെ വന്നിരുന്നു. നിമിഷയുടെ മാത്രമല്ല മറ്റു പലരുടെയും മോചനത്തിനായി ശ്രമിക്കുന്നുണ്ടെന്നും ഇറാന് വിദേശകാര്യ മന്ത്രി സെയ്ദ് അബ്ബാസ് അറിയിച്ചു.
യെമനില് വധശിക്ഷ കാത്ത് കഴിയുന്ന നിമിഷ പ്രിയയുടെ മോചനം ജോണ് ബ്രിട്ടാസ് എംപി രാജ്യസഭയില് ഉന്നയിച്ചിരുന്നു. തുടര്ന്ന് നിമിഷപ്രിയയുടെ കുടുംബത്തിന്റെ ആവശ്യപ്രകാരം വിദേശകാര്യമന്ത്രാലയത്തിന്റെ അക്കൗണ്ടിലൂടെ 40,000 ഡോളര് കൊല്ലപ്പെട്ടയാളുടെ കുടുംബത്തിന് കൈമാറിയെന്ന് കേന്ദ്രമന്ത്രി കീര്ത്തിവര്ധന് സിംഗ് മറുപടി നല്കി. ഇനിയുള്ള നടപടികള്ക്കായി നിമിഷപ്രിയയുടെ കുടുംബവും കൊല്ലപ്പെട്ടയാളുടെ കുടുംബവും തമ്മില് ചര്ച്ച തുടരുകയാണെന്നും വിദേശകാര്യ മന്ത്രി പറഞ്ഞു. നിമിഷ പ്രിയയുടെ അമ്മയ്ക്ക് യെമനിലേക്ക് പോകാന് സൗകര്യം ഒരുക്കി. ചര്ച്ചയ്ക്കായി പവര് ഓഫ് അറ്റോണിയെ നിയോഗിച്ചു. ഒരു അഭിഭാഷകന്റെ സഹായം വിദേശകാര്യമന്ത്രാലയം ഫണ്ട് ഉപയോഗിച്ച് ഉറപ്പാക്കി. ആക്ഷന് കൗണ്സില് കൊല്ലപ്പെട്ടയാളുടെ കുടുംബത്തിന് നല്കാന് പിരിച്ച ബ്ലഡ് മണി യെമനില് എത്തിക്കാനും സഹായം നല്കി. എന്നാല് മോചനം സാധ്യമാക്കാന് രണ്ട് കുടുംബങ്ങള്ക്കുമിടയില് നടക്കുന്ന ചര്ച്ച വിജയിക്കേണ്ടതുണ്ടെന്നും മന്ത്രി പറഞ്ഞു.
2017 ജൂലൈയില് അറസ്റ്റിലായ നിമിഷ പ്രിയക്ക് 2020ലാണ് വധശിക്ഷ വിധിച്ചത്. നിമിഷപ്രിയ നല്കിയ അപ്പീലുകളെല്ലാം തള്ളിയിരുന്നു. ബ്ലഡ് മണിയുടെ രണ്ടാം ഘട്ടം നല്കുന്നത് തടസപ്പെട്ടതിന് പിന്നാലെയാണ് യെമന് പ്രസിഡന്റ് വധശിക്ഷ ശരിവച്ചെന്ന റിപ്പോര്ട്ടുകള് പുറത്ത് വന്നത്.
കൂടുതല് വാര്ത്തകള്ക്കും തൊഴില് അവസരങ്ങള്ക്കും ഗള്ഫ് വാര്ത്തകള് ഗ്രൂപ്പില് ജോയിന് ചെയ്യുക- https://chat.whatsapp.com/Iz8594zylUiGUCaltFYrr7
ഗള്ഫ് വാര്ത്തകള് വാട്സ്ആപ്പ് ചാനല് ലിങ്ക്-
https://whatsapp.com/channel/0029VagTUieB4hdXiUEnVF1K
