തിരുവനന്തപുരം: സംസ്ഥാനത്ത് വീണ്ടും എംപോക്സ് സ്ഥിരീകരിച്ച സാഹചര്യത്തില് വിദേശ രാജ്യങ്ങളില് നിന്നുള്ളവര് പ്രത്യേകം ശ്രദ്ധിക്കണമെന്ന് ആരോഗ്യ വകുപ്പ്. രോഗലക്ഷണങ്ങളുണ്ടായാല് അത് മറ്റുള്ളവരിലേക്ക് പകരാതിരിക്കാന് വളരെയേറെ ശ്രദ്ധിക്കണം. വിദേശ രാജ്യങ്ങളില് നിന്നും വരുന്നവര്ക്ക് എന്തെങ്കിലും രോഗലക്ഷണങ്ങള് ഉണ്ടായാല് ചികിത്സ തേടുകയും ആരോഗ്യ വകുപ്പിനെ വിവരം അറിയിക്കുകയും വേണം. എല്ലാ ജില്ലകളിലും ഐസൊലേഷന് സൗകര്യം ഒരുക്കിയിട്ടുണ്ടെന്നും മന്ത്രി വ്യക്തമാക്കി.
സംസ്ഥാനത്ത് കൂടുതല് പേര്ക്ക് രോഗം സ്ഥിരീകരിക്കുന്നതിനാല് രോഗിയുമായി സമ്പര്ക്കത്തില് വന്നവരുടെ സമ്പര്ക്ക പട്ടിക തയ്യാറാക്കി പ്രതിരോധ പ്രവര്ത്തനങ്ങള് ശക്തമായിട്ടുണ്ട്. രോഗലക്ഷണങ്ങള് പ്രകടമായതിന് ശേഷമാണ് പ്രധാനമായും രോഗം പകരുന്നതെന്നും മന്ത്രലായം അറിയിച്ച. കൂടുതല് കേസുകളുടെ സാധ്യത മുന്നില് കണ്ട് എല്ലാ ജില്ലകളിലും കൂടുതല് ഐസൊലേഷന് സൗകര്യങ്ങളൊരുക്കാന് മന്ത്രി നിര്ദേശം നല്കി.
എന്താണ് എം പോക്സ്
കോവിഡ് 19 , എച്ച്1 എന്1 ഇന്ഫ്ളുവന്സ എന്നിവയെപ്പോലെ പോലെ വായുവിലൂടെ പകരുന്ന ഒരു രോഗമല്ല എം പോക്സ്. രോഗം ബാധിച്ച വ്യക്തിയുമായി മുഖാമുഖം വരിക, നേരിട്ട് തൊലിപ്പുറത്ത് സ്പര്ശിക്കുക, ലൈംഗിക ബന്ധത്തിലേര്പ്പെടുക, ചുംബിക്കുക, രോഗി ഉപയോഗിച്ച കിടക്ക, വസ്ത്രം എന്നിവ ഉപയോഗിക്കുക തുടങ്ങിയവയിലൂടെ രോഗപ്പകര്ച്ചക്കുള്ള സാധ്യത വളരെയേറെയാണ്.
ത്വക് രോഗ വിദഗ്ധരുടെ യോഗം ചേര്ന്നിരുന്നു. ഐഎംഎയുടെ സഹകരണത്തോടെ സ്വകാര്യ മേഖലയിലെ ഫിസിഷ്യന്, പീഡിയാട്രീഷ്യന്, ഡെര്മറ്റോളജിസ്റ്റ് എന്നിവരെ കൂടി ഉള്പ്പെടുത്തി യോഗം ചേരും. പ്രായമായവര്, കുട്ടികള്, ഗര്ഭിണികള് എന്നിവരെ പ്രത്യേകം ശ്രദ്ധിക്കണം. ഫീല്ഡ് തല ആരോഗ്യ പ്രവര്ത്തകര് ജാഗ്രതയോടെയിരിക്കണം. പൊതുജനാരോഗ്യ പ്രവര്ത്തനങ്ങള് ശാക്തീകരിക്കുന്നതിന് ഫീല്ഡ് ആരോഗ്യ പ്രവര്ത്തകരുടെ യോഗം ഉടനെ വിളിച്ച് ചേര്ക്കുനതാണ്.
പനി, തീവ്രമായ തലവേദന, കഴലവീക്കം, നടുവേദന, പേശി വേദന, ഊര്ജക്കുറവ് എന്നിവയാണ് എം പോക്സിന്റെ പ്രാരംഭ ലക്ഷണങ്ങള്. പനി തുടങ്ങി ഒരാഴ്ചയ്ക്കുള്ളില് ദേഹത്ത് കുമിളകളും ചുവന്ന പാടുകളും പ്രത്യക്ഷപ്പെടാന് തുടങ്ങുന്നു. മുഖത്തും, കൈകാലുകളിലുമാണ് കൂടുതല് കുമിളകള് കാണപ്പെടുന്നത്. ഇതിനുപുറമെ കൈപ്പത്തി, ജനനേന്ദ്രിയം എന്നീ ശരീരഭാഗങ്ങളിലും ഇവ കാണപ്പെടാം.
അസുഖബാധിതരായ ആള്ക്കാരുമായി സുരക്ഷാ മാര്ഗങ്ങള് അവലംബിക്കാതെ അടുത്തിടപഴകുന്ന ആള്ക്കാര്ക്കാണ് എംപോക്സ് ഉണ്ടാകുന്നത്. വൈറസ് ബാധയുണ്ടെന്ന് സംശയിക്കുന്നതോ സ്ഥിരീകരിച്ചതോ ആയ രോഗികളെ പരിചരിക്കുന്ന ആരോഗ്യ പ്രവര്ത്തകരും രോഗബാധിതരുടെ സ്രവങ്ങള് കൈകാര്യം ചെയ്യുന്നവരും രോഗപ്പകര്ച്ച ഒഴിവാക്കുന്നതിനായി നിര്ബന്ധമായും നിര്ദേശിച്ചിട്ടുള്ള അണുബാധ നിയന്ത്രണ മുന്കരുതലുകള് സ്വീകരിക്കണം. ആരോഗ്യ പ്രവര്ത്തകര് രോഗികളെയോ അവരുടെ വസ്തുക്കളെയോ സ്പര്ശിച്ച ശേഷം കൈകള് സാനിറ്റൈസര് അല്ലെങ്കില് സോപ്പും വെള്ളവും ഉപയോഗിച്ച് വൃത്തിയാക്കണം.
കൂടുതൽ ജിസിസി വാർത്തകൾക്കും തൊഴിൽ അവസരങ്ങൾക്കും ഗൾഫ് വാർത്തകൾ ഗ്രൂപ്പിൽ ജോയിൻ ചെയ്യുക-https://chat.whatsapp.com/DEUubIBAkhI9HFrIvyQtal
ഗൾഫ് വാർത്തകൾ വാട്സ്ആപ്പ് ചാനൽ ലിങ്ക്-https://whatsapp.com/channel/0029VagTUieB4hdXiUEnVF1K
