തിരുവനന്തപുരം: കേരള സംസ്ഥാന ഭാഗ്യക്കുറിയുടെ പേരില് ഓണ്ലൈനില് വ്യാജ ലോട്ടറി വില്പന നടത്തുന്നതായി കേരള പോലീസ് അറിയിച്ചു. ഇത്തരത്തില് കണ്ടെത്തിയ വ്യാജ ഭാഗ്യക്കുറി തട്ടിപ്പ് ആപ്പുകള് പ്ലേ സ്റ്റോറില് നിന്ന് നീക്കം ചെയ്യണമെന്ന് ആവശ്യപ്പെട്ട് ഗൂഗിളിന് നോട്ടീസ് നല്കി. ഇത്തരം ഓണ്ലൈന് ലോട്ടറികളുടെ പരസ്യങ്ങള് ഫേസ്ബുക്കില് നിന്ന് നീക്കം ചെയ്യാന് മെറ്റയ്ക്കും നോട്ടീസ് നല്കിയിട്ടുണ്ട്.
ഓണ്ലൈന് ലോട്ടറിയുടെ 60 വ്യാജ ആപ്പുകളാണ് പോലീസിന്റെ സൈബര് പട്രോളിങിനെത്തുടര്ന്ന് കണ്ടെത്തിയത്. തട്ടിപ്പുമായി ബന്ധപ്പെട്ട് 25 വ്യാജ ഫേസ് ബുക്ക് പ്രൊഫൈലും 20 വെബ് സൈറ്റുകളും കണ്ടെത്തി. തട്ടിപ്പിനു പിന്നില് പ്രവര്ത്തിക്കുന്നവരെ കണ്ടെത്തി കര്ശന നിയമനടപടി സ്വീകരിക്കുമെന്നും പോലീസ് അറിയിച്ചു.
കേരള മെഗാ മില്യണ് ലോട്ടറി, കേരള സമ്മര് സീസണ് ധമാക്ക എന്നീ പേരുകളില് സമൂഹ മാധ്യമങ്ങള് വഴി കേരള സംസ്ഥാന ലോട്ടറി ഓണ്ലൈന് ആയി എടുക്കാം എന്ന വ്യാജ പരസ്യം കഴിഞ്ഞ കുറച്ചു ദിവസങ്ങളായി വാട്സ്ആപ്പ്, ടെലഗ്രാം, ഇന്സ്റ്റാഗ്രാം എന്നീ സമൂഹ മാധ്യമങ്ങള് വഴി പ്രചരിക്കുന്നുണ്ട്. കേരള സര്ക്കാര് ഓണ്ലൈന് ലോട്ടറി ആരംഭിച്ചെന്നും 40 രൂപ മുടക്കിയാല് 12 കോടി രൂപ വരെ നേടാമെന്നുമുള്ള സന്ദേശമാണ് ലഭിക്കുക. സന്ദേശത്തില് പറയുന്ന നമ്പറിലേയ്ക്ക് 40 രൂപ അയച്ചാല് വാട്സ്ആപ്പിലേയ്ക്ക് വ്യാജ ലോട്ടറി ടിക്കറ്റിന്റെ ചിത്രം അയച്ചു നല്കും. നറുക്കെടുപ്പിന്റെ സമയം കഴിയുമ്പോള് കൃത്രിമമായി നിര്മ്മിച്ച നറുക്കെടുപ്പ് ഫലം തട്ടിപ്പുകാര് അയച്ചുനല്കുകയും ഫലം പരിശോധിക്കുമ്പോള് കൈവശമുള്ള ടിക്കറ്റിന് അഞ്ചു ലക്ഷം രൂപ സമ്മാനം ലഭിച്ചതായി കാണിക്കുകയും ചെയ്യും.
ഇതോടെ തട്ടിപ്പിന്റെ അടുത്തഘട്ടം ആരംഭിക്കുന്നു. സര്ക്കാര് പ്രതിനിധിയെന്നു പരിചയപ്പെടുത്തിക്കൊണ്ട് ഒരാള് ഫോണില് വിളിക്കുകയും സമ്മാനത്തുക ലഭിക്കാന് ജി എസ് ടി, സ്റ്റാമ്പ് ഡ്യൂട്ടി എന്നീ ആവശ്യത്തിനായി പണം ബാങ്ക് അക്കൗണ്ടിലേയ്ക്ക് ട്രാന്സ്ഫര് ചെയ്യാന് ആവശ്യപ്പെടുകയും ചെയ്യുന്നു. ഇങ്ങനെ പണം ട്രാന്സ്ഫര് ചെയ്തുകഴിയുമ്പോള് റിസര്വ്വ് ബാങ്ക് സമ്മാനത്തുക പിടിച്ചുവച്ചിരിക്കുന്നതായും സമ്മാനം കൈമാറാനായി കൂടുതല് പണം വേണമെന്നും ആവശ്യപ്പെടുന്നു. ഓരോ ചുവടും വിശ്വസനീയമായി തോന്നിക്കാനായി കൃത്രിമമായി നിര്മ്മിച്ച രേഖകളും വീഡിയോകളും ഇരകള്ക്ക് നല്കുന്നു.
ഇത്തരത്തില് വളരെ വിശ്വസനീയമായി തോന്നിപ്പിക്കുന്ന രീതിയില് നടത്തുന്ന വ്യാജഭാഗ്യക്കുറിയുടെ ഓണ്ലൈന് തട്ടിപ്പിന് ഇരയാകാതിരിക്കാന് പൊതുജനങ്ങള് ജാഗ്രത പുലര്ത്തണം. സാമ്പത്തികത്തട്ടിപ്പിനിരയായാല് ഉടന് തന്നെ 1930 എന്ന നമ്പറില് പോലീസിനെ വിവരം അറിയിക്കണമെന്നും കേരളാ പോലീസ് അറിയിച്ചു.
കൂടുതൽ വാർത്തകൾക്കും തൊഴിലവസരങ്ങൾക്കും ഗൾഫ് വാർത്തകൾ ഗ്രൂപ്പിൽ ജോയിൻ ചെയ്യുക https://chat.whatsapp.com/DEUubIBAkhI9HFrIvyQtal
ഗൾഫ് വാർത്തകൾ വാട്സ്ആപ്പ് ചാനൽ ലിങ്ക് https://whatsapp.com/channel/0029VagTUieB4hdXiUEnVF1K
