മലപ്പുറം: കേരളത്തില് പലയിടങ്ങളിലും മഞ്ഞപ്പിത്തം (ഹെപ്പറ്റൈറ്റിസ്-എ) പടരുന്ന സാഹചര്യത്തില് കൂടുതല് ജാഗ്രത പാലിക്കണമെന്ന് ആരോഗ്യവകുപ്പ് നിര്ദേശിച്ചു. നിലവില് മഞ്ഞപ്പിത്തം റിപ്പോര്ട്ട് ചെയ്യപ്പെടുന്ന മലപ്പുറം, എറണാകുളം, കോഴിക്കോട്, തൃശൂര് ജില്ലകളില് അതീവ ശ്രദ്ധ പുലര്ത്തണമെന്നും ആരോഗ്യവകുപ്പ് അറിയിച്ചു. പ്രദേശങ്ങളില് പ്രതിരോധ പ്രവര്ത്തനങ്ങള് ശക്തമാക്കണമെന്നും രോഗബാധിത പ്രദേശങ്ങളിലെ കുടിവെള്ള സ്രോതസ്സുകളില് ക്ലോറിനേഷന് നടത്തണമെന്നും അതോറിറ്റി മുന്നറിയിപ്പ് നല്കി.
മഞ്ഞപ്പിത്തം പ്രധാനമായും മലിനമായ വെള്ളത്തിലൂടെ പകരുന്ന രോഗമായതിനാല് തിളപ്പിച്ചാറ്റിയ വെള്ളം മാത്രമേ കുടിക്കാന് പാടുള്ളൂവെന്നും ആരോഗ്യ വകുപ്പ് മന്ത്രി വീണാ ജോര്ജ് അറിയിച്ചു. മലിനമായ ജലസ്രോതസുകളിലൂടെയും മലിനമായ വെള്ളം ഉപയോഗിച്ച് നിര്മ്മിക്കുന്ന ഭക്ഷണം, ഐസ്, ശീതള പാനീയങ്ങള് എന്നിവയിലൂടെയും, മലിനജലം ഉപയോഗിച്ച് പാത്രം കഴുകുക, കൈ കഴുകുക തുടങ്ങിയവയിലൂടെയും, സെപ്റ്റിക് ടാങ്കുകളിലെ ചോര്ച്ച മുഖേന കിണറുകളിലെ വെള്ളം മലിനമാകുന്നതിലൂടെയും, മഞ്ഞപ്പിത്തം ഉണ്ടാകാനുള്ള സാധ്യതയുണ്ട്. മറ്റ് അനുബന്ധ രോഗങ്ങളുള്ളവര്ക്ക് ഹെപ്പറ്റൈറ്റിസ്-എ ഗുരുതരമാകാന് സാധ്യതയുള്ളതിനാല് വളരെയധികം ശ്രദ്ധിക്കണമെന്നും രോഗലക്ഷണങ്ങള് കണ്ടാല് ഉടന് തന്നെ ചികിത്സ തേടണമെന്നും മന്ത്രി അഭ്യര്ത്ഥിച്ചു.
