തിരുവനന്തപുരം: കേരളത്തിന്റെ പുതിയ മുഖ്യമന്ത്രിയെ തീരുമാനിക്കാനുള്ള നിര്ണ്ണായക കോണ്ഗ്രസ് നിയമസഭാ കക്ഷി യോഗം ഇന്ന്. എഐസിസി നിരീക്ഷകരായ മുകുള് വാസ്നിക്കും അജയ് മാക്കനും നേതാക്കന്മാരേയും എംഎല്എമാരെയും നേരില് കണ്ട് അഭിപ്രായം തേടി. മുഖ്യമന്ത്രി ചുമതല സംബന്ധിച്ച് മുതിര്ന്ന നേതാക്കളുമായും ഘടകകക്ഷികളുമായും നേതാക്കള് ചര്ച്ച നടത്തി. കെ സുധാകരന്, വിഎം സുധീരന്, കൊടിക്കുന്നില് സുരേഷ് തുടങ്ങി പ്രമുഖ നേതാക്കളുമായി നിരീക്ഷകര് കൂടിക്കാഴ്ച്ച നടത്തി. അഭിപ്രായങ്ങള് ഹൈക്കമാന്ഡിനെ അറിയിച്ച് തീരുമാനമെടുക്കും. ശേഷം കേരളത്തില് നിന്നുള്ള നേതാക്കളെ നാളെ ഡല്ഹിയിലേക്ക് വിളിപ്പിക്കുമെന്നാണ് വിവരം.
45 എംഎല്എമാരുടെ പിന്തുണ ഉറപ്പിച്ച ആത്മവിശ്വാസത്തിലാണ് എഐസിസി ജനറല് സെക്രട്ടറി കൂടിയായ കെ സി വേണുഗോപാല് പക്ഷം. 25 എംഎല്എമാരുടെ പിന്തുണ ഉറപ്പിച്ചെന്ന് മുതിര്ന്ന നേതാവ് രമേശ് ചെന്നിത്തലയും പ്രതിപക്ഷ നേതാവ് വി ഡി സതീശനും അവകാശപ്പെടുന്നു. പരമാവധി എംഎല്എമാരെ തങ്ങളുടെ പക്ഷത്തെത്തിക്കാനുള്ള ശ്രമത്തിലാണ് മൂന്ന് നേതാക്കളും.
അതിനിടയിലും നേതാക്കള്ക്കായുള്ള ഫ്ളക്സ് യുദ്ധവും തുടരുകയാണ്. ഡല്ഹിയില് കേരള ഹൗസിന് മുന്നില് വി ഡി സതീശന് വേണ്ടി ഫ്ളക്സ് ബോര്ഡുകള് പ്രത്യക്ഷപ്പെട്ടു. പട നയിച്ചവന് നാട് നയിക്കട്ടെ എന്നാണ് ഫ്ളക്സിലെ വാചകം. കെപിസിസി ആസ്ഥാനത്തിന് മുന്നില് കെസി വേണുഗോപാലിന് വേണ്ടിയും ഫ്ളക്സ് ബോര്ഡുകള് പ്രത്യക്ഷപ്പെട്ടു. വീ വാണ്ട് കെ സി എന്ന തലക്കെട്ടിലാണ് ബോര്ഡ് സ്ഥാപിച്ചത്.
അതേസമയം, 2021 ആവര്ത്തിക്കരുതെന്നാണ് മുതിര്ന്ന നേതാക്കളുടെ നിര്ദേശം. ഇക്കാര്യം എഐസിസി നിരീക്ഷകര്ക്ക് മുന്നില് അവതരിപ്പിച്ചുവെന്നാണ് റിപ്പോര്ട്ട്. മുഖ്യമന്ത്രിയായി ആരെ തീരുമാനിച്ചാലും ബാക്കി ഉള്ളവരെ കൂടി ബോധ്യപ്പെടുത്തണമെന്നും 2021ല് ചെന്നിത്തലയെ പ്രതിപക്ഷ നേതൃസ്ഥാനത്ത് നിന്ന് മാറ്റിയ രീതി ആവര്ത്തിക്കരുതെന്നും മുതിര്ന്ന നേതാക്കള് ആവശ്യപ്പെട്ടെന്നാണ് റിപ്പോര്ട്ട്.
കൂടുതല് വാര്ത്തകള്ക്കും തൊഴിലവസരങ്ങള്ക്കും ഗള്ഫ് മലയാളി വാര്ത്താ ഗ്രൂപ്പില് ജോയിന് ചെയ്യുക – https://chat.whatsapp.com/BEtoiocklOc8D5XDkdaHoR?mode=hq2tcla
വാട്സ്ആപ്പ് ചാനല് ലിങ്ക്- https://whatsapp.com/channel/0029VagTUieB4hdXiUEnVF1K
Who will become the next kerala CM. important meeting held at kpcc today
