ദോഹ: രാജ്യത്ത് ശക്തമായി പൊടിക്കാറ്റ് വീശുന്നതിനാല് പൊതുജനങ്ങള് ആരോഗ്യ സുരക്ഷാ നടപടികള് സ്വീകരിക്കണമെന്ന് ആരോഗ്യ വിദഗ്ധര് നിര്ദേശിച്ചു. സൈനസ്, ശ്വസന പ്രശ്നങ്ങള് തുടങ്ങിയ അലര്ജികള്ക്ക് പുറമേ, ദൃശ്യപരത കുറയുന്നത് മൂലം പൊടിക്കാറ്റ് റോഡ് സുരക്ഷയ്ക്ക് കാര്യമായ അപകടസാധ്യതകളും വര്ധിപ്പിക്കുന്നു.
രാജ്യത്തിന്റെ മിക്ക ഭാഗങ്ങളിലും ശക്തമായ കാറ്റും മോശം ദൃശ്യപരതയും ഉണ്ടാകുമെന്ന് ഖത്തര് കാലാവസ്ഥാ വകുപ്പ് പ്രവചിച്ചിട്ടുണ്ട്.
ചില പ്രദേശങ്ങളില് മിതമായ താപനിലയും നേരിയ പൊടിക്കാറ്റും ഉണ്ടാകും. ഇന്നലെ പുലര്ച്ചെ വടക്കന് ഗള്ഫ് മേഖലയില് നിന്നാണ് മണല്ക്കാറ്റ് ഉത്ഭവിച്ചത്. ഇത് ഇപ്പോഴും പല ഭാഗങ്ങളിലും തുടരുകയാണ്. വാരാന്ത്യത്തില് മുഴുവന് ഇതേ തരത്തില് പൊടിക്കാറ്റ് തുടരുമെന്ന് പ്രതീക്ഷിക്കുന്നതായും അതോറിറ്റി അറിയിച്ചു.
പൊടിക്കാറ്റ് ശ്വസനവ്യവസ്ഥയ്ക്ക് കാര്യമായ ആരോഗ്യ അപകടങ്ങള് സൃഷ്ടിക്കും. പരമാവധി വീടിനുള്ളില് തന്നെ തുടരാനും പുറത്തുപോകുമ്പോള് മാസ്കുകള് ധരിക്കാനും ആരോഗ്യ വിദഗ്ധര് നിര്ദേശിച്ചു. കുട്ടികള് ഉള്പ്പെടെ ശ്വസന രോഗങ്ങളുള്ളവര് മുന്കരുതലായി അവരുടെ ഡോക്ടര്മാര് നിര്ദ്ദേശിക്കുന്ന ഇന്ഹേലറുകള്, നെബുലൈസറുകള് അല്ലെങ്കില് മറ്റ് ശ്വസന മരുന്നുകള് ഉപയോഗിക്കണം. കുട്ടികള് സ്കൂളില് പോകുമ്പോള് മാസ്ക് ധരിക്കുന്നുവെന്ന് ഉറപ്പാക്കുക.
കടുത്ത ശ്വാസതടസ്സം അനുഭവപ്പെട്ടാല് ഉടന് തന്നെ ആംബുലന്സ് സര്വീസിനെ വിളിക്കണം. നേരിയ ലക്ഷണങ്ങള് അനുഭവിക്കുന്നവര് അടുത്തുള്ള ആരോഗ്യ കേന്ദ്രം/ ആശുപത്രി അല്ലെങ്കില് അത്യാഹിത വിഭാഗം സന്ദര്ശിക്കണമെന്നും അധികൃതര് വ്യക്തമാക്കി. പൊടിക്കാറ്റ് കാരണം മൂടല്മഞ്ഞിന് സമാനമായി ദൃശ്യപരത ഗണ്യമായി കുറഞ്ഞതിനാല്, പ്രത്യേകിച്ച് ഹൈവേകളിലും പുറം പ്രദേശങ്ങളിലും ജാഗ്രതയോടെ വാഹനമോടിക്കണമെന്നും അതോറിറ്റി നിര്ദേശിച്ചു.
കൂടുതല് വാര്ത്തകള്ക്കും തൊഴില് അവസരങ്ങള്ക്കും ഗള്ഫ് വാര്ത്തകള് ഗ്രൂപ്പില് ജോയിന് ചെയ്യുക- https://chat.whatsapp.com/Iz8594zylUiGUCaltFYrr7
ഗള്ഫ് വാര്ത്തകള് വാട്സ്ആപ്പ് ചാനല് ലിങ്ക്- https://whatsapp.com/channel/0029VagTUieB4hdXiUEnVF1K
