കോട്ടയം: ചാനല് ചര്ച്ചയ്ക്കിടെ നടത്തിയ മതവിദ്വേഷ പരാമര്ശ കേസില് ബിജെപി നേതാവ് പി സി ജോര്ജ് കോടതിയില് കീഴടങ്ങി. ഈരാറ്റുപേട്ട മുന്സിഫ് കോടതിയിലാണ് കീഴടങ്ങിയത്. ഹൈക്കോടതിയും മുന്കൂര് ജാമ്യാപേക്ഷ തള്ളിയതിന് പിന്നാലെ അറസ്റ്റിലേക്ക് പോലീസ് നീങ്ങിയതോടെയാണ് പി സി ജോര്ജിന്റെ കീഴടങ്ങല്. അഭിഭാഷകര്ക്കൊപ്പമാണ് പി സി ജോര്ജ് കോടതിയിലെത്തിയത്.
പി സി ജോര്ജിന്റെ അഭിഭാഷകന് സിറിലും മരുമകള് പാര്വതിയും എത്തിയതിന് പിന്നാലെയാണ് കീഴടങ്ങുന്നതിനായി ജോര്ജ് കോടതിയിലെത്തിയത്. നിയമം പാലിക്കുമെന്നും താന് കീഴടങ്ങനാണ് വന്നതെന്നും പി സി ജോര്ജ് മാധ്യമങ്ങളോട് പ്രതികരിച്ചു. കേസില് ജോര്ജിന്റെ മുന്കൂര് ജാമ്യാപേക്ഷ ഹൈക്കോടതിയും കോട്ടയം ജില്ലാ സെഷന്സ് കോടതിയും തള്ളിയിരുന്നു. പിന്നാലെ രണ്ട് തവണ അറസ്റ്റിനായി ജോര്ജിന്റെ വീട്ടില് പൊലീസ് എത്തിയെങ്കിലും നോട്ടീസ് കൈമാറാനായില്ല. പിന്നാലെ ഹാജരാകാന് രണ്ട് ദിവസത്തെ സാവകാശം തേടിയിരുന്നു. തിങ്കളാഴ്ച ഹാജരാകാമെന്നാണ് പോലീസിനെ അറിയിച്ചിരുന്നത്. എന്നാല്, പൊലീസ് നീക്കത്തിന് വഴങ്ങാതെ നാടകീയമായി ജോര്ജ് കോടതിയിലെത്തി കീഴടങ്ങുകയായിരുന്നു.
ഇക്കഴിഞ്ഞ ജനുവരി ആറിന് ഒരു ചാനല് ചര്ച്ചയില് പി സി ജോര്ജ് നടത്തിയ പരാമര്ശത്തിനെതിരെയാണ് ഈരാറ്റുപേട്ട പോലീസ് കേസെടുത്തത്. മതസ്പര്ധ വളര്ത്തല്, കലാപാഹ്വാനം തുടങ്ങിയ വകുപ്പുകള് ചുമത്തിയാണ് കേസ്. ഈരാറ്റുപേട്ട യൂത്ത് ലീഗ് മണ്ഡലം കമ്മിറ്റിയാണ് പരാതി നല്കിയത്. ചര്ച്ചക്കിടെ പി സി ജോര്ജ് മുസ്ലിം വിരുദ്ധ പരാമര്ശങ്ങള് നടത്തിയെന്നാണ് പരാതി.
കൂടുതല് വാര്ത്തകള്ക്കും തൊഴില് അവസരങ്ങള്ക്കും ഗള്ഫ് വാര്ത്തകള് ഗ്രൂപ്പില് ജോയിന് ചെയ്യുക- https://chat.whatsapp.com/Iz8594zylUiGUCaltFYrr7
ഗള്ഫ് വാര്ത്തകള് വാട്സ്ആപ്പ് ചാനല് ലിങ്ക്- https://whatsapp.com/channel/0029VagTUieB4hdXiUEnVF1K
