ദോഹ: ഖത്തറില് പ്രവാസികള് ഉള്പ്പെടെയുള്ള ചില വിഭാഗങ്ങളിലെ താമസക്കാര്ക്ക് സര്ക്കാര് ഫീസുകളില് ഇളവ് പ്രഖ്യാപിച്ചു. വികലാംഗര്, സാമൂഹിക സുരക്ഷാ സ്വീകര്ത്താക്കള്, മുതിര്ന്ന പൗരന്മാര്, വിരമിച്ചവര് എന്നിവര്ക്കാണ് ഫീസിളവ് പ്രഖ്യാപിച്ചത്. തീരുമാനത്തിന് ഖത്തര് മന്ത്രിസഭാ യോഗം അംഗീകാരം നല്കി.
പ്രധാനമന്ത്രിയും വിദേശകാര്യ മന്ത്രിയുമായ ഷെയ്ഖ് മുഹമ്മദ് ബിന് അബ്ദുള്റഹ്മാന് ബിന് ജാസിം അല്താനിയുടെ അധ്യക്ഷതയില് ചേര്ന്ന മന്ത്രിസഭാ യോഗത്തിലാണ് തീരുമാനം. വികലാംഗര്, സാമൂഹിക സുരക്ഷാ സ്വീകര്ത്താക്കള്, മുതിര്ന്ന പൗരന്മാര്, വിരമിച്ചവര് എന്നിവര്ക്ക് തിരഞ്ഞെടുത്ത സര്ക്കാര് സേവന ഫീസുകള് ഒഴിവാക്കുന്നതിനോ ഇളവുകള് നല്കുന്നതിനോ ഉള്ള തീരുമാനത്തിനാണ് മന്ത്രിസഭാ യോഗത്തിന്റെ അംഗീകാരം ലഭിച്ചത്.
ഗവണ്മെന്റ് സേവന ഫീസ് പഠിക്കുന്നതിനുള്ള സാങ്കേതിക സമിതിയുടെ ശുപാര്ശകള് നടപ്പിലാക്കുന്നതിന് ആവശ്യമായ നടപടികള് സ്വീകരിക്കുന്നതിനും യോഗം അംഗീകാരം നല്കി.
നടപ്പിലാക്കിയ ഫീസ് മാറ്റങ്ങള് ഇപ്രകാരമാണ്:
ആഭ്യന്തര മന്ത്രാലയം
വൈകല്യമുള്ളവര്, സാമൂഹിക സുരക്ഷാ സ്വീകര്ത്താക്കള്, മുതിര്ന്ന പൗരന്മാര്, വിരമിച്ചവര് എന്നിവര്ക്ക് റെസിഡന്സി പെര്മിറ്റുകളും ട്രാഫിക് വകുപ്പും ഉള്പ്പെടെയുള്ള ആഭ്യന്തര മന്ത്രാലയത്തിലെ ചില സേവനങ്ങളില് ഇളവുകളും കിഴിവുകളും ലഭിക്കും.
വിദേശകാര്യ മന്ത്രാലയം
വാണിജ്യേതര രേഖകളുടെ സാക്ഷ്യപ്പെടുത്തലുകള്- വൈകല്യമുള്ളവരും സാമൂഹിക സുരക്ഷാ സ്വീകര്ത്താക്കള്ക്കും ഫീസ് ഒഴിവാക്കി. മുതിര്ന്നവര്ക്കും വിരമിച്ചവര്ക്കും സേവന ഫീസില് 50% കിഴിവ് ലഭിക്കും.
മുനിസിപ്പാലിറ്റി മന്ത്രാലയം
പൊതു പാര്ക്കിംഗും പാര്ക്കുകളിലും എല്ലാ വിഭാഗങ്ങള്ക്കും ഫീസില് ഇളവ് ലഭിക്കും.
പൊതുജനാരോഗ്യ മന്ത്രാലയം
ആരോഗ്യ കാര്ഡ് വിതരണത്തില് എല്ലാ വിഭാഗക്കാര്ക്കും ഇളവ് അനുവദിക്കും.
നീതിന്യായ മന്ത്രാലയം
മന്ത്രാലയ ജീവനക്കാര്ക്ക് ഓഫ്-സൈറ്റ് സേവന ഫീസ് – ഭിന്നശേഷിക്കാര്ക്കും സാമൂഹിക സുരക്ഷാ സ്വീകര്ത്താക്കള്ക്കും സേവനങ്ങള് സൗജന്യമായിരിക്കും. മുതിര്ന്നവര്ക്കും വിരമിച്ചവര്ക്കും 200 റിയാല് ആയിരിക്കും ഫീസ്.
വാണിജ്യ, വ്യവസായ മന്ത്രാലയം
ടാംവീന് കാര്ഡ് വിതരണത്തില് എല്ലാ വിഭാഗക്കാര്ക്കും ഫീസിളവ് ലഭിക്കും.
കൂടുതൽ വാർത്തകൾക്കും തൊഴിലവസരങ്ങൾക്കും ഗൾഫ് വാർത്തകൾ ഗ്രൂപ്പിൽ ജോയിൻ ചെയ്യുക –https://chat.whatsapp.com/DEUubIBAkhI9HFrIvyQtal
വാട്സ്ആപ്പ് ചാനൽ ലിങ്ക്-https://whatsapp.com/channel/0029VagTUieB4hdXiUEnVF1K
