ഡല്ഹി: ഇന്ത്യയിലെത്തിയ ഖത്തര് അമീര് ശൈഖ് തമീം ബിന് ഹമദ് അല്താനി ഇന്ന് പ്രധാനമന്ത്രി നരേന്ദ്ര മോദിയുമായി കൂടിക്കാഴ്ച നടത്തും. ഉച്ചയ്ക്ക് പന്ത്രണ്ടിന് ഹൈദരാബാദ് ഹൗസിലാണ് കൂടിക്കാഴ്ച. ഊര്ജ്ജ മേഖലയിലടക്കം സഹകരണം ശക്തമാക്കാനുള്ള കരാറുകളില് ഇരു രാജ്യങ്ങളും ഒപ്പുവയ്ക്കും.
രണ്ടു ദിവസത്തെ ഔദ്യോഗിക സന്ദര്ശനത്തിന് ഇന്നലെ ഇന്ത്യയില് എത്തിയ ഖത്തര് അമീറിനെ പ്രോട്ടോക്കോള് മാറ്റിവച്ച് വിമാനത്താവളത്തില് നേരിട്ടെത്തി പ്രധാനമന്ത്രി നരേന്ദ്ര മോദി സ്വീകരിച്ചിരുന്നു. ഇന്ന് രാവിലെ രാഷ്ട്രപതി ഭവനില് അമീറിന് ആചാരപരമായ വരവേല്പ്പും നല്കി. രാഷ്ട്രപതി ദ്രൗപതി മുര്മുവുമായും അമീര് കൂടിക്കാഴ്ച നടത്തും. കൂടിക്കാഴ്ചയ്ക്ക് ശേഷം രാത്രി എട്ടരയ്ക്ക് ഖത്തര് അമീര് ഇന്ത്യയില് നിന്ന് മടങ്ങും.
പ്രധാനമന്ത്രി നരേന്ദ്ര മോദിയുടെ ക്ഷണ പ്രകാരമാണ് അമീര് ഇന്ത്യയിലെത്തിയത്. ഖത്തര് പ്രധാനമന്ത്രിയും വിദേശകാര്യ മന്ത്രിയുമായ ശൈഖ് മുഹമ്മദ് ബിന് അബ്ദുള്റഹ്മാന് ബിന് ജാസിം അല്താനിയും ഔദ്യോഗിക പ്രതിനിധി സംഘവും അമീറിനൊപ്പമുണ്ട്. ഇത് രണ്ടാം തവണയാണ് ഖത്തര് അമീര് ഇന്ത്യയിലെത്തുന്നത്. 2015 മാര്ച്ചിലായിരുന്നു ആദ്യ സന്ദര്ശനം. കഴിഞ്ഞ ദിവസം ഇന്ത്യന് വിദേശകാര്യമന്ത്രി എസ് ജയശങ്കറുമായും അമീര് ചര്ച്ച നടത്തിയിരുന്നു.
കൂടുതല് വാര്ത്തകള്ക്കും തൊഴില് അവസരങ്ങള്ക്കും ഗള്ഫ് വാര്ത്തകള് ഗ്രൂപ്പില് ജോയിന് ചെയ്യുക- https://chat.whatsapp.com/Iz8594zylUiGUCaltFYrr7
ഗള്ഫ് വാര്ത്തകള് വാട്സ്ആപ്പ് ചാനല് ലിങ്ക്- https://whatsapp.com/channel/0029VagTUieB4hdXiUEnVF1K
