റിയാദ്: സൗദി അറേബ്യയിലേക്ക് നിയന്ത്രിത മയക്കുമരുന്ന് കൊണ്ടുപോകുന്നതിനായി യാത്രക്കാര്ക്ക് ഡിജിറ്റല് സംവിധാനം ആരംഭിച്ചു. യാത്രക്കാര്ക്ക് നിര്ദ്ദേശിച്ച മരുന്നുകള്ക്ക് ഓണ്ലൈന് ക്ലിയറന്സ് പെര്മിറ്റുകള് ലഭിക്കുന്നതിനുള്ള പുതിയ മാര്ഗ്ഗനിര്ദ്ദേശങ്ങളും സൗദി ഫുഡ് ആന്ഡ് ഡ്രഗ് അതോറിറ്റി (എസ്എഫ്ഡിഎ) അവതരിപ്പിച്ചു.
സുരക്ഷാ മാനദണ്ഡങ്ങള് പാലിച്ച് രോഗികളെ പിന്തുണയ്ക്കുന്നതിനും യാത്രാ കാര്യക്ഷമത വര്ദ്ധിപ്പിക്കുന്നതിനുമാണ് പുതിയ സംവിധാനം. നിയന്ത്രിത മരുന്നുകളുടെ പെര്മിറ്റുകളുമായി ബന്ധപ്പെട്ട എല്ലാ വിവരങ്ങളും [https://cds.sfda.gov.sa] എന്ന വെബ്സൈറ്റില് കണ്ട്രോള്ഡ് ഡ്രഗ്സ് സിസ്റ്റം (CDS) വഴി ലഭ്യമാണെന്നും അധികൃതര് വ്യക്തമാക്കി. രാജ്യത്തിന്റെ നിയമപ്രകാരം കര്ശനമായി നിയന്ത്രിക്കപ്പെടുന്ന മയക്കുമരുന്ന്, സൈക്കോട്രോപിക് വസ്തുക്കള് ഉള്പ്പെടെയുള്ളവ അതില് പറഞ്ഞിട്ടുണ്ട്.
യാത്രക്കാര്ക്ക് സിഡിഎസ് പ്ലാറ്റ്ഫോം വഴി വ്യക്തിഗത അക്കൗണ്ട് ക്രിയേറ്റ് ചെയ്ത് രോഗിയുടെ വിശദാംശങ്ങളും യാത്രാ വിവരങ്ങളും അടങ്ങിയ ഒരു ഇലക്ട്രോണിക് ക്ലിയറന്സ് പെര്മിറ്റിനുള്ള അപേക്ഷ സമര്പ്പിക്കണം. മരുന്നിന്റെ കുറിപ്പടി, മെഡിക്കല് റിപ്പോര്ട്ട്, തിരിച്ചറിയല് രേഖകള് തുടങ്ങിയ അനുബന്ധ രേഖകളും അപ്ലോഡ് ചെയ്യണം. മരുന്നുകളുടെ പേര്, ചേരുവ, മരുന്നിന്റെ സാന്ദ്രത, അളവ് അല്ലെങ്കില് പായ്ക്ക് വലുപ്പം എന്നിവ ഉള്പ്പെടെയുള്ള കൃത്യമായ വിശദാംശങ്ങള് നല്കിക്കൊണ്ട് ഒന്നിലധികം മരുന്നുകള്ക്ക് പെര്മിറ്റിന് അപേക്ഷിക്കാനും കഴിയും.
യാത്രക്കാരനോ മറ്റൊരു രോഗിക്കോ വേണ്ടിയാണ് മരുന്നുകള് കൊണ്ടുപോകുന്നതെങ്കില് മരുന്നിന്റെ മെഡിക്കല് ആവശ്യകത തെളിയിക്കുന്ന രേഖകള് അപേക്ഷകര് ഉള്പ്പെടുത്തണം. തുടര്ന്ന് അപേക്ഷകന് പെര്മിറ്റ് അപേക്ഷയുടെ നില ട്രാക്ക് ചെയ്യാനും കഴിയും.
കൂടുതല് വാര്ത്തകള്ക്കും തൊഴിലവസരങ്ങള്ക്കും ഗള്ഫ് മലയാളി വാര്ത്താ ഗ്രൂപ്പില് ജോയിന് ചെയ്യുക – https://chat.whatsapp.com/DEUubIBAkhI9HFrIvyQtal
വാട്സ്ആപ്പ് ചാനല് ലിങ്ക്- https://whatsapp.com/channel/0029VagTUieB4hdXiUEnVF1K
