കൊച്ചി: പെട്രോള് പമ്പുകളിലെ ശൗചാലയങ്ങള് ഉപയോഗിക്കുന്നതുമായി ബന്ധപ്പെട്ട ഇടക്കാല ഉത്തരവില് മാറ്റം വരുത്തി ഹൈക്കോടതി. ദേശീയപാതയോരത്തെ പെട്രോള് പമ്പുകളിലെ ശൗചാലയം പൊതുജനങ്ങള്ക്ക് ഉപയോഗിക്കാമെന്ന് ഹൈക്കോടതി പറഞ്ഞു. പെട്രോള് പമ്പുകളിലെ ശൗചാലയങ്ങള് 24 മണിക്കൂറും തുറന്നു നല്കണമെന്നും ഹൈക്കോടതി നിര്ദേശിച്ചു. ഉപയോക്താക്കള്ക്കും യാത്രികര്ക്കും ശൗചാലയം ഉപയോഗിക്കാമെന്നും ഹൈക്കോടതി വ്യക്തമാക്കി. എന്നാല് ദേശീയ പാതയോരത്ത് അല്ലാത്ത പെട്രോള് പമ്പുകളിലെ ശൗചാലയ ഉപയോഗത്തിന് നിയന്ത്രണമുണ്ടാകും. അവിടങ്ങളില് ഉപയോക്താക്കള്ക്കും ദീര്ഘദൂര യാത്രക്കാര്ക്കും മാത്രമായിരിക്കും ശൗചാലയം ഉപയോഗിക്കാന് അനുമതി.
സംസ്ഥാനത്തെ പെട്രോള് പമ്പുകളിലെ ശൗചാലയങ്ങള് പൊതു ശൗചാലയങ്ങളാക്കാനുളള സര്ക്കാരിന്റെ ശ്രമങ്ങളെ ചോദ്യംചെയ്ത് പെട്രോളിയം ട്രേഡേഴ്സ് വെല്ഫെയര് ആന്ഡ് ലീഗല് സര്വീസസ് സൊസൈറ്റിയും മറ്റ് അഞ്ച് പെട്രോളിയം റീട്ടെയിലര്മാരും സമര്പ്പിച്ച റിട്ട് ഹര്ജിയില് വാദം കേള്ക്കുന്നതിനിടെ ജസ്റ്റിസ് സി എസ് ഡയസാണ് ഇടക്കാല ഉത്തരവ് ഭേദഗതി ചെയ്തത്. പെട്രോള് പമ്പുകളോട് അനുബന്ധിച്ചുളളത് സ്വകാര്യ ശൗചാലയങ്ങളാണെന്നും അത് പൊതുശൗചാലയങ്ങളാക്കി മാറ്റുന്നത് ഭരണഘടന ഉറപ്പുനല്കുന്ന സ്വത്തവകാശത്തിന്റെ ലംഘനമാണെന്നുമായിരുന്നു ഹര്ജിക്കാരുടെ വാദം.
കൂടുതല് വാര്ത്തകള്ക്കും തൊഴിലവസരങ്ങള്ക്കും ഗള്ഫ് മലയാളി വാര്ത്താ ഗ്രൂപ്പില് ജോയിന് ചെയ്യുക – https://chat.whatsapp.com/DEUubIBAkhI9HFrIvyQtal
വാട്സ്ആപ്പ് ചാനല് ലിങ്ക്- https://whatsapp.com/channel/0029VagTUieB4hdXiUEnVF1K
