കൊച്ചി: കൊച്ചിയിലെ സ്വകാര്യ മാര്ക്കറ്റിംഗ് കമ്പനിയില് ക്രൂരമായ തൊഴില് പീഡനം. ടാര്ഗറ്റ് അച്ചീവ് ചെയ്യാത്ത ജോലിക്കാരെ ക്രൂരപീഡനത്തിന് ഇരയാക്കുന്ന വീഡിയോ ദൃശ്യങ്ങള് പുറത്ത്. യുവാക്കളുടെ കഴുത്തില് ബെല്റ്റിട്ട് പട്ടിയെപ്പോലെ നടത്തിക്കുന്ന ദൃശ്യങ്ങളാണ് പ്രചരിക്കുന്നത്. കൊച്ചി ആസ്ഥാനമായ ഹിന്ദുസ്ഥാന് പവര് ലിങ്ക്സ് എന്ന മാര്ക്കറ്റിംഗ് സ്ഥാപനത്തിനെതിരെയാണ് ആരോപണം.
അതേസമയം സംഭവവുമായി ബന്ധപ്പെട്ട് പരാതികള് ഒന്നും കിട്ടിയിട്ടില്ലെന്ന് തൊഴില് വകുപ്പും പൊലീസും അറിയിച്ചു. പ്രചരിക്കുന്ന ദൃശ്യങ്ങളുടെ ആധികാരികത പരിശോധിച്ചു വരികയാണെന്നും അധികൃതര് പറഞ്ഞു. കഴിഞ്ഞ സെപ്റ്റംബറില് നടന്ന സംഭവത്തിന്റെ ദൃശ്യങ്ങളാണ് ഇപ്പോള് പ്രചരിക്കുന്നതെന്ന് സ്ഥാപനത്തില് മുമ്പ് ജോലി ചെയ്തിരുന്നതായി അവകാശപ്പെടുന്ന യുവാവ് സാക്ഷ്യപ്പെടുത്തുന്നു. ടാര്ഗറ്റ് അച്ചീവ് ചെയ്യാത്തതിന്റെ പേരിലാണ് ഈ തരത്തിലുള്ള ശിക്ഷാനടപടികള് എന്നാണ് ആരോപണം.
ആറ് മാസത്തെ ട്രെയിനിംഗിന് ജോലിയില് പ്രവേശിപ്പിക്കുന്നവര്ക്കെതിരെയാണ് ഈ ക്രൂരത. യുവാവ് ഒരാഴ്ച മുമ്പ് പെരുമ്പാവൂര് പൊലീസ് സ്റ്റേഷനില് പരാതി നല്കിയിരുന്നു. എന്നാല് പൊലീസ് നടപടി എടുത്തില്ലെന്നുമാണ് അഞ്ചുമാസം സ്ഥാപനത്തില് ജോലി ചെയ്ത യുവാവിന്റെ വെളിപ്പെടുത്തല്. കഴുത്തില് ബെല്റ്റിട്ട് നായ്ക്കളെ പോലെ നടത്തിക്കുക, നായ്ക്കളെ പോലെ ഭക്ഷണം കഴിപ്പിക്കുക, വായില് ഉപ്പ് വാരിയിട്ട് തുപ്പാന് അനുവദിക്കാതിരിക്കുക തുടങ്ങിയ പീഡനങ്ങളാണ് തൊഴിലാളികള്ക്ക് നേരെ നടക്കുന്നത്. പല വീടുകള് കയറി സാധങ്ങള് വില്ക്കുകയാണ് തൊഴിലാളികളുടെ ടാര്ഗറ്റ്. എന്നാല് ടാര്ഗറ്റ് പൂര്ത്തിയാക്കാന് സാധിക്കാത്ത സാഹചര്യങ്ങളുണ്ടാകാറുണ്ട്. അതിന് ശേഷം ഓഫീസിലെത്തുന്നവരെ പീഡിപ്പിക്കും. മുഖത്തടക്കം ക്രൂര പീഡനങ്ങള് നടത്തുമെന്നാണ് ആരോപണം.
പത്രത്തിലെ പരസ്യം കണ്ടാണ് പലരും ജോലിക്ക് വരുന്നത്. അഭിമുഖത്തിന്റെ സമയത്ത് ആറ് മാസം ട്രെയിനിങ്ങും 8000-10000 വരെ ശമ്പളം നല്കുമെന്നും വാഗ്ദാനം ചെയ്യും. എന്നാല് ജോലിക്ക് കയറിയതിന് ശേഷം ശമ്പളമില്ലെന്നാണ് മാനേജര്മാര് പറയുന്നത്. ശമ്പളം ചോദിച്ചാല് സ്റ്റൈപ്പന്റ് നല്കാനേ പറ്റൂ എന്നാണ് മാനേജര്മാര് പറയുന്നതെന്നും തൊഴിലാളികള് പറയുന്നു. ട്രെയിനിങ് കഴിഞ്ഞാല് ഉയര്ന്ന വരുമാനം ലഭിക്കുമെന്ന വാഗ്ദാനത്തിലാണ് പലരും പിടിച്ചു നിന്നതെന്നും എന്നാല് ആറ് മാസം കഴിഞ്ഞിട്ടും ട്രെയിനിങ് പിരീഡില് നിന്ന് മാറ്റുന്നില്ലെന്നും അവര് പറഞ്ഞു. ഉപദ്രവിക്കാന് വേണ്ടി മാത്രം കമ്പനിയില് മാനേജര്മാരുണ്ടെന്നാണ് തൊഴിലാളികള് പറയുന്നത്.
കൂടുതല് വാര്ത്തകള്ക്കും തൊഴില് അവസരങ്ങള്ക്കും ഗള്ഫ് വാര്ത്തകള് ഗ്രൂപ്പില് ജോയിന് ചെയ്യുക- https://chat.whatsapp.com/Iz8594zylUiGUCaltFYrr7
ഗള്ഫ് വാര്ത്തകള് വാട്സ്ആപ്പ് ചാനല് ലിങ്ക്- https://whatsapp.com/channel/0029VagTUieB4hdXiUEnVF1K
