തിരുവനന്തപുരം: കേരളത്തിലെ സര്ക്കാര് ആശുപത്രികള് ഡിജിറ്റലിലേക്ക്. വിവിധ സേവനങ്ങള്ക്കുള്ള തുക ഡിജിറ്റലായി അടയ്ക്കാന് കഴിയുന്ന സംവിധാനം സംസ്ഥാനത്തെ സര്ക്കാര് ആശുപത്രികളില് സജ്ജമാക്കിയതായി ആരോഗ്യ വകുപ്പ് മന്ത്രി വീണാ ജോര്ജ് അറിയിച്ചു. ആദ്യ ഘട്ടത്തില് 313 ആശുപത്രികളിലാണ് ഈ സൗകര്യം ഒരുക്കിയിരിക്കുന്നത്. ബാക്കിയുള്ള ആശുപത്രികളില് കൂടി ഈ സംവിധാനം ഒരു മാസത്തിനകം സജ്ജമാക്കാനുള്ള നടപടികള് പുരോഗമിക്കുകയാണെന്ന് മന്ത്രി അറിയിച്ചു. അതോടൊപ്പം ഓണ്ലൈനായി ഒപി ടിക്കറ്റ് എടുക്കാനും സംവിധാനം ഏര്പ്പെടുത്തും.
സംസ്ഥാനത്തെ ആരോഗ്യ ചികിത്സാ കേന്ദ്രങ്ങളില് ഇനി ഡിജിറ്റലായി പണമടയ്ക്കാം. ക്രെഡിറ്റ് കാര്ഡ്, ഡെബിറ്റ് കാര്ഡ്, യുപിഐ (ഗൂഗിള് പേ, ഫോണ് പേ) മുതലായവ വഴി പണമടക്കുന്നതിനുള്ള സൗകര്യമാണ് ഒരുക്കിയിട്ടുള്ളത്. തദ്ദേശ സ്വയം ഭരണ വകുപ്പിന് കീഴിലുള്ള ഇന്ഫര്മേഷന് കേരള മിഷനുമായി സഹകരിച്ചാണ് ഈ പദ്ധതി നടപ്പിലാക്കിയിട്ടുള്ളത്. ഇതിനുള്ള പിഒഎസ് ഉപകരണങ്ങള് സ്റ്റേറ്റ് ബാങ്ക് ഓഫ് ഇന്ത്യ, കാനറാ ബാങ്ക് എന്നിവര് വഴി ലഭ്യമാക്കിയെന്നും മന്ത്രി അറിയിച്ചു.
സംസ്ഥാനത്തെ ആരോഗ്യ വകുപ്പിന് കീഴില് വരുന്ന എല്ലാ മോഡേണ് മെഡിസിന് ആശുപത്രികളിലും ഡോക്ടര്മാരുടെ സേവനം ലഭിക്കാന് മുന്കൂറായി ഒപി ടിക്കറ്റ് ഓണ്ലൈനായി എടുക്കാന് സൗകര്യമൊരുക്കുന്നു. ആദ്യ ഘട്ടത്തില് ഇ-ഹെല്ത്ത് പദ്ധതി നടപ്പില് വരുത്തിയിട്ടുള്ള 687 ആശുപത്രികളും ഇ-ഹെല്ത്ത് പദ്ധതി നടപ്പില് വരുത്തിയിട്ടില്ലാത്ത താലൂക്ക് ആശുപത്രി മുതല് മെഡിക്കല് കോളേജ് വരെയുള്ള 80 ഓളം ആരോഗ്യ കേന്ദ്രങ്ങളും ഉള്പ്പെട്ടിട്ടുണ്ട്. കമ്പ്യൂട്ടര്, സ്മാര്ട്ട് ഫോണ്, അക്ഷയ കേന്ദ്രം എന്നിവ മുഖേന പൊതുജനങ്ങള്ക്ക് ഈ സൗകര്യം ഉപയോഗപ്പെടുത്താവുന്നതാണ്.
ഒരു വ്യക്തിക്ക് തന്റെ യു.എച്ച് ഐഡി അല്ലെങ്കില് മൊബൈല് നമ്പര് ഉപയോഗിച്ച് തന്റേയും തന്റെ കുടുംബത്തിലെ അംഗങ്ങളുടേയും ചികിത്സാ വിവരങ്ങള്, മരുന്ന് കുറിപ്പടികള്, ലാബ് ടെസ്റ്റ് റിപ്പോര്ട്ടുകള് മുതലായ ഡിജിറ്റല് വിവരങ്ങള് മൊബൈല് ആപ്പ് വഴി ലഭ്യമാക്കുന്നതാണ് എം-ഇഹെല്ത്ത് ആപ്പ്. ആന്ഡ്രോയിഡ് ഫോണില് ഈ മൊബൈല് അപ്ലിക്കേഷന് ഡൗണ്ലോഡ് ചെയ്ത് ഉപയോഗിക്കാം. ഈ മൊബൈല് അപ്ലിക്കേഷന് ഉപയോഗിച്ച് മുന്കൂറായി ഒപി ടിക്കറ്റും എടുക്കാന് കഴിയും.
സര്ക്കാര് ആശുപത്രിയില് ഡോക്ടറുടെ സേവനം ലഭിക്കുന്നതിന് മുന്കൂറായി ടോക്കണ് എടുക്കാതെ വരുന്ന രോഗികള്ക്ക് ക്യൂ ഇല്ലാതെ ടോക്കണ് എടുക്കാന് കഴിയുന്നതാണ് സ്കാന് എന് ബുക്ക് സംവിധാനം. ആശുപത്രിയില് പ്രദര്ശിപ്പിച്ചിട്ടുള്ള ക്യുആര് കോഡ് സ്മാര്ട്ട് ഫോണ് ഉപയോഗിച്ച് സ്കാന് ചെയ്ത് ഒപി ടിക്കറ്റ് ഓണ്ലൈനായി എടുക്കാന് ഇതിലൂടെ സാധിക്കും. ഇതുവഴി റിസപ്ഷനില് ക്യൂ നില്കാതെ ഡോക്ടറുടെ സേവനം തേടാം. ഡിജിറ്റലായി പണമടയ്ക്കാനുള്ള സംവിധാനം, ഓണ്ലൈനായി ഒപി ടിക്കറ്റ്, എം-ഇഹെല്ത്ത് ആപ്പ്, സ്കാന് എന് ബുക്ക് സംവിധാനങ്ങള് എന്നിവയുടെ ഉദ്ഘാടനം ഏപ്രില് 7ന് ആരോഗ്യ വകുപ്പ് മന്ത്രി വീണാ ജോര്ജ് നിര്വഹിക്കും
കൂടുതല് വാര്ത്തകള്ക്കും തൊഴില് അവസരങ്ങള്ക്കും ഗള്ഫ് വാര്ത്തകള് ഗ്രൂപ്പില് ജോയിന് ചെയ്യുക- https://chat.whatsapp.com/Iz8594zylUiGUCaltFYrr7
ഗള്ഫ് വാര്ത്തകള് വാട്സ്ആപ്പ് ചാനല് ലിങ്ക്- https://whatsapp.com/channel/0029VagTUieB4hdXiUEnVF1K
