കൊല്ലം: കേരളത്തില് കുഞ്ഞുങ്ങള്ക്ക് വിതരണം ചെയ്യുന്ന അമൃതം ന്യൂട്രിമിക്സിന് ഗുണനിലവാരമില്ലെന്നതുമായി ബന്ധപ്പെട്ട പരാതികളില് നടപടികളുമായി സംസ്ഥാന ഭക്ഷ്യ കമ്മീഷന്. കമ്മീഷനില് പരാതി ലഭിച്ചതിന്റ അടിസ്ഥാനത്തില് ഇന്നലെ സംസ്ഥാന ഭക്ഷ്യ കമ്മീഷന് ചെയര്പേഴ്സണ് ഡോ.ജിനു സഖറിയ ഉമ്മന്, അംഗം അഡ്വ.സബിദാ ബീഗം എന്നിവര് കൊല്ലം ജില്ലയിലുളള അമൃതം ന്യൂട്രിമിക്സ് യൂണിറ്റുകളില് പരിശോധന നടത്തി. കൊല്ലം ജില്ലയിലെ തഴവ ഭാഗത്തുളള ന്യൂട്രിമിക്സ് യൂണിറ്റുകള്, പരിശോധനാ സമയം അടഞ്ഞുകിടക്കുകയായിരുന്നു. തുടര്ന്ന് മണപ്പളളി ഭാഗത്തുളള ബയോവിറ്റ അമൃതം ന്യൂട്രിമിക്സ് ഭക്ഷ്യ കമ്മീഷന് പരിശോധന നടത്തി. പരിശോധനയില് പ്രസ്തുത യൂണിറ്റ് മാനദണ്ഡങ്ങള്ക്ക് വിരുദ്ധമായാണ് പ്രവര്ത്തിക്കുന്നതെന്നും കണ്ടെത്തി.
മൂന്ന് വയസ്സു മുതല് 6 വയസ്സുവരെയുളള കുട്ടികള്ക്ക് നല്കുന്ന പോഷകാഹാരം നല്കുന്ന സ്ഥാപനത്തില് പ്രാഥമികമായ വൃത്തിയാക്കലുകള് പോലും നടക്കുന്നില്ലെന്ന് കമ്മീഷന് കണ്ടെത്തി. സാമ്പിളുകള് പരിശോധിച്ചതിന്റെ അടിസ്ഥാനത്തില് നടത്തേണ്ട അടിയന്തിര ഇടപെടലുകള് നടത്തിപ്പുകാരായ കുടുംബശ്രീയുടെ ഭാഗത്ത് നിന്നും ഉണ്ടായിട്ടില്ല. ഇതെല്ലാം അതീവഗുരുതരമായ വീഴ്ചയാണെന്നും വിഷയത്തില് ശക്തമായ നടപടികള് ആവശ്യമാണെന്നും സംസ്ഥാന ഭക്ഷ്യ കമ്മീഷന് ചെയര്പേഴ്സണ് വ്യക്തമാക്കി.
സാമ്പിള് പരിശോധിച്ച ലാബ് റിപ്പോര്ട്ട് പ്രകാരം, സ്ഥാപനത്തില് നിന്ന് വിതരണം നടത്തിയ ഭക്ഷ്യ വസ്തുക്കള്(അമൃതംപെടി) സുരക്ഷിതമല്ലെന്ന് അറിഞ്ഞിട്ടും അധികാരികള് നാളിതുവരെയായിട്ടും തുടര്നടപടികള് ഒന്നും തന്നെ എടുത്തിട്ടില്ല എന്നത് അതീവ ഗുരുതരമായ അവസ്ഥയാണെന്ന് കമ്മീഷന് വിലയിരുത്തി. കഴിഞ്ഞ ശനിയാഴ്ച പൊടിച്ച് മിക്സ് ചെയ്ത അമൃതംപൊടി നാലു ദിവസമായിട്ടും പായ്ക്ക് ചെയ്യാത്ത അവസ്ഥയില് ഇരിക്കുന്നു. സ്ഥാപനത്തിന്റെ മേല്ക്കൂരയില് മാറാലകള് പറ്റിപ്പിടിച്ചിരിക്കുന്നത് വൃത്തിയാക്കാതെ ഇരിക്കുന്നത് അനുവദനീയമല്ല. സ്റ്റോക്ക് ചെയ്തിരിക്കുന്ന ഭക്ഷ്യ ധാന്യങ്ങള് പരിശോധിച്ചതില് നിന്ന് വര്ഷങ്ങളായി ഒരേ സ്ഥാപനത്തില് നിന്നാണ് ധാന്യങ്ങള് വാങ്ങുന്നത് എന്നും കൃത്യമായ ഗുണനിലവാരം കാണുന്നില്ലായെന്നത് മനസിലായി.
തുടര്ന്ന് ധാന്യങ്ങളുടെയും അമൃതംപൊടിയുടെയും സാമ്പിളുകള് ഫുഡ് സേഫ്റ്റി അധികൃതര് പരിശോധനയ്ക്കായി ശേഖരിച്ചു. സ്ഥാപനത്തിന്റെ മേല്നോട്ട ചുമതലയുളള കുടുംബശ്രീയുടെ അധികാരികളെ ഭക്ഷ്യ കമ്മീഷന് അംഗമായ അഡ്വ.സബിദാ ബീഗം നേരിട്ട് വിളിച്ചിട്ടും പരിശോധന കഴിഞ്ഞിട്ടും ആരും തന്നെ സ്ഥാപനത്തില് വന്നില്ല. സ്ഥാപനത്തിന്റെ പ്രവര്ത്തനം ഈ രീതിയില് മുന്നോട്ട് പോകുന്നത് ശരിയല്ലായെന്നും ശുചിത്വവും നിര്മ്മാണവും സംബന്ധിച്ച സര്ക്കാര് മാനദണ്ഡം കൃത്യമായി പാലിച്ച് സ്ഥാപനം നടത്തേണ്ടതാണെന്ന് ഭക്ഷ്യ കമ്മീഷന് ചെയര്പേഴ്സണ് സ്ഥാപന നടത്തിപ്പുക്കാരെ അറിയിച്ചു. ഇതുമായി ബന്ധപ്പെട്ട് ശക്തമായ തുടര്നടപടികള് ഉണ്ടാകുമെന്നും ഭക്ഷ്യ കമ്മീഷന് അറിയിച്ചു.
കൂടുതല് വാര്ത്തകള്ക്കും തൊഴില് അവസരങ്ങള്ക്കും ഗള്ഫ് വാര്ത്തകള് ഗ്രൂപ്പില് ജോയിന് ചെയ്യുക- https://chat.whatsapp.com/Iz8594zylUiGUCaltFYrr7
ഗള്ഫ് വാര്ത്തകള് വാട്സ്ആപ്പ് ചാനല് ലിങ്ക്- https://whatsapp.com/channel/0029VagTUieB4hdXiUEnVF1K
