ദുബായ്: ഐസിസി ചാംപ്യന്സ് ട്രോഫി ഏകദിന ക്രിക്കറ്റ് ടൂര്ണമെന്റില് ഇന്ത്യക്ക് മിന്നും വിജയം. ഫൈനലില് ന്യൂസിലന്ഡിനെ നാല് വിക്കറ്റിന് തോല്പ്പിച്ചാണ് ഇന്ത്യയുടെ കീരീട നേട്ടം. ഇത് മൂന്നാം തവണയാണ് ഇന്ത്യ കിരീടം സ്വന്തമാക്കുന്നത്. 2013ന് ശേഷം ഇന്ത്യ നേടുന്ന ആദ്യ ഐസിസി ഏകദിന കിരീടമാണിത്.
ദുബായ് ഇന്റര്നാഷണല് ക്രിക്കറ്റ് സ്റ്റേഡിയത്തിലായിരുന്നു മത്സരം. 252 റണ്സ് വിജയലക്ഷ്യം പിന്തുടര്ന്ന ഇന്ത്യ 49 ഓവറില് ആറ് വിക്കറ്റ് നഷ്ടത്തില് ലക്ഷ്യം മറികടന്നു. ക്യാപ്റ്റന് രോഹിത് ശര്മയാണ് (76) ഇന്ത്യയുടെ ടോപ് സ്കോറര്. ശ്രേയസ് അയ്യര് 46 റണ്സെടുത്തു. കെ എല് രാഹുല് 33 പന്തില് പുറത്താവാതെ 34 റണ്സെടുത്തത് ഇന്നിംഗ്സില് നിര്ണായകമായി.
മത്സരത്തില് ടോസ് നേടിയ ന്യൂസിലാന്ഡ് ബാറ്റിംഗ് തിരഞ്ഞെടുത്തപ്പോള് ഇന്ത്യന് സ്പിന്നര്മാര് വരിഞ്ഞുമുറുക്കുകയായിരുന്നു. ഏഴ് വിക്കറ്റുകള് ന്യൂസിലന്ഡിന് നഷ്ടമായി. കുല്ദീപ് യാദവ്, വരുണ് ചക്രവര്ത്തി എന്നിവര് രണ്ട് വിക്കറ്റ് വീതം വീഴ്ത്തി. 63 റണ്സെടുത്ത ഡാരില് മിച്ചലാണ് കിവീസിന്റെ ടോപ് സ്കോറര്. 53 റണ്സുമായ പുറത്താവാതെ നിന്ന മൈക്കല് ബ്രേസ്വെല്ലിന്റെ ഇന്നിംഗ്സാണ് മാന്യമായ സ്കോറിലേക്ക് നയിച്ചത്.
അതേസമയം മറുപടി ബാറ്റിംഗില് ഗംഭീര തുടക്കമാണ് ഇന്ത്യക്ക് ലഭിച്ചത്. ഒന്നാം വിക്കറ്റില് രോഹിത് – ശുഭ്മാന് ഗില് സഖ്യം 105 റണ്സെടുത്തു. കോലി നേരിട്ട രണ്ടാം പന്തില് തന്നെ വിക്കറ്റിന് മുന്നില് കുടുങ്ങി. മൈക്കല് ബ്രേസ്വെല്ലിന്റെ പന്തില് മടങ്ങുകയായിരുന്നു താരം. പിന്നാലെ രോഹിത് ശര്മയും മടങ്ങി. മൂന്ന് സിക്സും ഏഴ് ഫോറും ഉള്പ്പെടുന്നതായിരുന്നു രോഹിത്തിന്റെ ഇന്നിംഗ്സ്.
ശ്രേയസ് അയ്യര് (48), അക്സര് പട്ടേല് (29), ഹാര്ദിക് പാണ്ഡ്യ (18) എന്നിവരാണ് പുറത്തായ മറ്റുതാരങ്ങള്. രാഹുല് ഒരറ്റത്ത് നിന്നത് ഇന്ത്യക്ക് ഗുണം ചെയ്തു. 49-ാം ഓവറിന്റെ അവസാന പന്തില് ഫോറടിച്ച് രവീന്ദ്ര ജഡേജ (9) ഇന്ത്യക്ക് വിജയം സമ്മാനിച്ചു.
കൂടുതൽ വാർത്തകൾക്കും തൊഴിൽ അവസരങ്ങൾക്കും ഗൾഫ് വാർത്തകൾ ഗ്രൂപ്പിൽ ജോയിൻ ചെയ്യുക-https://chat.whatsapp.com/Iz8594zylUiGUCaltFYrr7
ഗൾഫ് വാർത്തകൾ വാട്സ്ആപ്പ് ചാനൽ ലിങ്ക്-https://whatsapp.com/channel/0029VagTUieB4hdXiUEnVF1K
