ഇൻസ്റ്റന്റ് മെസ്സേജിംഗ് ആപ്പായ വാട്‌സ്ആപ്പിൽ പുതിയ ‘പാരന്റൽ കൺട്രോൾ’ (രക്ഷിതാക്കൾക്കുള്ള നിയന്ത്രണ) സംവിധാനങ്ങൾ പ്രഖ്യാപിച്ച് മെറ്റ. കുട്ടികൾ ആരുമായാണ് ആശയവിനിമയം നടത്തുന്നതെന്ന് നിരീക്ഷിക്കാനും, മെറ്റാ എഐ (Meta AI) സംഭാഷണങ്ങളിലെ ഉള്ളടക്ക ക്രമീകരണങ്ങൾ നിയന്ത്രിക്കാനും രക്ഷിതാക്കളെ സഹായിക്കുന്നതാണ് പുതിയ അപ്ഡേഷൻ. ടെക് ക്രഞ്ച് (TechCrunch) പുറത്തുവിട്ട റിപ്പോർട്ട് പ്രകാരം, വാട്സ്ആപ്പ് ചാനലുകൾ, സ്റ്റാറ്റസ്, ഗ്രൂപ്പുകൾ, പ്രൊഫൈൽ ചിത്രങ്ങൾ തുടങ്ങിയ വാട്സ്ആപ്പ് സേവനങ്ങൾ കൗമാരക്കാർ എങ്ങനെ ഉപയോഗിക്കുന്നു എന്നതിൻ്റെ മേൽ കൂടുതൽ നിയന്ത്രണം നേടാൻ ഈ പുതിയ സംവിധാനങ്ങൾ രക്ഷിതാക്കളെ പ്രാപ്തരാക്കും. കുട്ടികളുടെ വാട്സ്ആപ്പ് ഉപയോഗം നിയന്ത്രിക്കാനും, അവരുടെ സ്റ്റാറ്റസ് ആരൊക്കെ കാണണം എന്ന് തീരുമാനിക്കാനും രക്ഷിതാക്കൾക്ക് സാധിക്കും.
തങ്ങളുടെ കൗമാരപ്രായക്കാരായ മക്കളെ ഏതൊക്കെ ഗ്രൂപ്പുകളിൽ ആരൊക്കെയാണ് ചേർക്കേണ്ടത് എന്നോ, അവരുടെ പ്രൊഫൈൽ ചിത്രം ആരൊക്കെയാണ് കാണേണ്ടത് എന്നോ തീരുമാനിക്കാനുള്ള സൗകര്യം മാതാപിതാക്കൾക്കുണ്ട്. പുതിയ ഗ്രൂപ്പിൽ ചേരുകയോ ഗ്രൂപ്പിൽ നിന്ന് പുറത്തുപോവുകയോ ചെയ്യുമ്പോഴുള്ള മാറ്റങ്ങൾ, അല്ലെങ്കിൽ ഗ്രൂപ്പ് അംഗങ്ങളുടെ എണ്ണം 30, 100, 250 എന്നിങ്ങനെയാകുമ്പോൾ ലഭിക്കുന്ന അറിയിപ്പുകൾ (notifications) എന്നിവ സജ്ജീകരിക്കാനും വാട്സാപ്പ് അവസരമൊരുക്കുന്നു. ഈ ക്രമീകരണങ്ങളെല്ലാം മാതാപിതാക്കൾ നിശ്ചയിക്കുന്ന ഒരു പിൻ (PIN) നമ്പറുമായി ബന്ധിപ്പിച്ചിരിക്കും. അതായത്, മാതാപിതാക്കളുടെ അനുമതിയില്ലാതെ കൗമാരക്കാർക്ക് തങ്ങൾക്കു മേലുള്ള നിയന്ത്രണങ്ങളിൽ മാറ്റം വരുത്താൻ കഴിയില്ല. അതേസമയം, ഈ നിയന്ത്രണ സംവിധാനങ്ങൾ പൂർണ്ണമായും ഒഴിവാക്കാനും രക്ഷിതാക്കൾക്ക് സാധിക്കും.
ഇതിനായി വാട്സ്ആപ്പിലെ ഡിഫോൾട്ട് 13+ ഓപ്ഷനോ ലിമിറ്റഡ് കണ്ടന്റ് എന്ന കർശനമായ ക്രമീകരണമോ മാതാപിതാക്കൾക്ക് തിരഞ്ഞെടുക്കാം, ഇത് ഇൻകോഗ്നിറ്റോ ചാറ്റുകൾ, സന്ദേശ സംഗ്രഹം എന്നിവ പോലുള്ള പ്രത്യേക പ്രോസസ്സിംഗിനെ അടിസ്ഥാനമാക്കിയുള്ള ചില സവിശേഷതകൾ പ്രവർത്തനരഹിതമാക്കുന്നു. പുതിയ പാരന്റൽ കൺട്രോൾ ടൂളുകൾ ചേർക്കുന്നത് സന്ദേശങ്ങളുടെയും കോളുകളുടെയും സ്വകാര്യതയെ ബാധിക്കില്ലെന്നും, അവ എൻഡ്-ടു-എൻഡ് എൻക്രിപ്ഷൻ വഴി സംരക്ഷിക്കപ്പെടുന്നുവെന്നും, മറ്റ് കക്ഷികൾക്ക് അവയിലേക്ക് ആക്‌സസ് ഉണ്ടാകില്ലെന്നും വാട്ട്‌സ്ആപ്പ് സ്ഥിരീകരിച്ചു.
കുട്ടികളുടെ സോഷ്യൽ മീഡിയ ഉപയോഗം നിയന്ത്രിക്കണമെന്ന ആവശ്യം ഉയർന്നതിന് പിന്നാലെയാണിത്.
കൂടുതൽ വാർത്തകൾക്കും തൊഴിലവസരങ്ങൾക്കും ഗൾഫ് മലയാളി വാർത്താ ഗ്രൂപ്പിൽ ജോയിൻ ചെയ്യുക –https://chat.whatsapp.com/BEtoiocklOc8D5XDkdaHoR?mode=hq2tcla
വാട്സ്ആപ്പ് ചാനൽ ലിങ്ക്-https://whatsapp.com/channel/0029VagTUieB4hdXiUEnVF1K
