മസ്കത്ത്: ഒമാന് എയറും യാത്രക്കാര്ക്കായി കര്ശന നിയന്ത്രണം ഏര്പ്പെടുത്തി. ലിഥിയം ബാറ്ററികള്, പവര് ബാങ്കുകള്, സ്മാര്ട്ട് ലഗേജ്, ഇ-സിഗരറ്റുകള് എന്നിവ വിമാനത്തില് കൊണ്ടുപോകുന്നതുമായി ബന്ധപ്പെട്ട സുരക്ഷാ മാര്ഗ്ഗനിര്ദ്ദേശങ്ങളാണ് ഒമാന് എയര് പുറത്തിറക്കിയത്. ബാറ്ററികളുമായി ബന്ധപ്പെട്ട തീപിടിത്ത സാധ്യതകളെ പ്രതിരോധിക്കുന്നതിന്റെ ഭാഗമായാണ് വിമാനക്കമ്പനി സുരക്ഷാ പ്രോട്ടോക്കോളുകള് പുതുക്കിയത്.
യാത്രക്കാര് ബാഗേജ് മാര്ഗ്ഗനിര്ദ്ദേശങ്ങള് കര്ശനമായി പാലിക്കണം. കൂടുതല് വിവരങ്ങള്ക്ക് കമ്പനിയുമായി ബന്ധപ്പെടാവുന്നതാണ്. യാത്ര സുരക്ഷിതവും സുഗമവുമാക്കുക എന്നതാണ് പുതുക്കിയ നയം ലക്ഷ്യമിടുന്നതെന്നും രാജ്യാന്തര വ്യോമയാന സുരക്ഷാ മാനദണ്ഡങ്ങള്ക്ക് അനുസൃതമാണിതെന്നും എയര്ലൈന് അധികൃതര് പറഞ്ഞു. നിയമങ്ങള് എല്ലാ ഒമാന് എയര് വിമാനങ്ങള്ക്കും ബാധകമാണ്.
പവര് ബാങ്കുകള് ഹാന്ഡ് ലഗേജില് മാത്രമേ കൊണ്ടുപോകാവൂ, ചെക്ക്-ഇന് ബാഗേജുകളില് പവര് ബാങ്കുകള്ക്ക് കര്ശന നിരോധനമേര്പ്പെടുത്തി. യാത്രയ്ക്കിടെ പവര്ബാങ്കുകള് ഉപയോഗിക്കുന്നതിനും ചാര്ജ് ചെയ്യുന്നതിനും വിലക്കുണ്ട്. അവ സീറ്റിനടിയിലോ സീറ്റ് പോക്കറ്റിലോ സൂക്ഷിക്കണം, കേടായതോ ലേബല് ചെയ്യാത്തതോ ആയ യൂണിറ്റുകള് സ്വീകരിക്കില്ല.
സ്മാര്ട്ട് ബാഗുകള്ക്കും എയര്ലൈന് കര്ശന നിയന്ത്രണങ്ങള് ഏര്പ്പെടുത്തിയിട്ടുണ്ട്. നീക്കം ചെയ്യാനാവാത്ത ബാറ്ററിയുള്ള ഏതൊരു ബാഗും ചെക്ക് ഇന് ചെയ്യാന് കഴിയില്ലെന്നും അധികൃതര് അറിയിച്ചു. നീക്കം ചെയ്യാവുന്ന ബാറ്ററിയുള്ള സ്മാര്ട്ട് ബാഗുകളുമായി യാത്ര ചെയ്യുന്നവര് ചെക്ക്-ഇന് ചെയ്യുന്നതിന് മുമ്പ് ബാറ്ററി പുറത്തെടുത്ത് വിമാനയാത്രയില് മുഴുവന് കാബിനില് കൊണ്ടുപോകണം. കൂടാതെ, ഇ-സിഗരറ്റുകളും വേപ്പുകളും ഹാന്ഡ് ബാഗേജിലോ വ്യക്തികളുടെ കൈവശമോ മാത്രമേ അനുവദിക്കൂ, കൂടാതെ ചാര്ജ് ചെയ്യുന്നതോ വിമാനത്തില് ഉപയോഗിക്കുന്നതോ അനുവദിക്കില്ല.
കൂടുതല് വാര്ത്തകള്ക്കും തൊഴിലവസരങ്ങള്ക്കും ഗള്ഫ് മലയാളി വാര്ത്താ ഗ്രൂപ്പില് ജോയിന് ചെയ്യുക- https://chat.whatsapp.com/DEUubIBAkhI9HFrIvyQtal
വാട്സ്ആപ്പ് ചാനല് ലിങ്ക്- https://whatsapp.com/channel/0029VagTUieB4hdXiUEnVF1K
