ഡല്ഹി: അഹമ്മദാബാദ് വിമാന ദുരന്തത്തില് കൊല്ലപ്പെട്ടവരുടെ മൃതദേഹങ്ങള് മാറി നല്കിയതായി പരാതി. ബ്രിട്ടീഷ് പൗരന്മാരുടെ മൃതദേഹങ്ങള് മാറിയെന്ന പരാതിയുമായി രണ്ട് കുടുംബങ്ങള് രംഗത്തുവന്നു. മൃതദേഹം മാറിയതിനാല് ഒരു കുടുംബം സംസ്ക്കാര ചടങ്ങ് മാറ്റി വെച്ചതായാണ് വിവരം. ഒരു കുടുംബത്തിന് കൈമാറിയ ശവപ്പെട്ടിക്കുള്ളില് വ്യത്യസ്ത മൃതദേഹഭാഗങ്ങളെന്നും പരാതി ഉയരുന്നുണ്ട്. പ്രധാനമന്ത്രി നരേന്ദ്രമോദിയുടെ സന്ദര്ശന വേളയില് ബ്രിട്ടീഷ് പ്രധാനമന്ത്രി ഇക്കാര്യം ഉന്നയിച്ചേക്കുമെന്നാണ് വിവരം.
ജൂണ് 12നാണ് ലണ്ടനിലേക്ക് പുറപ്പെട്ട എയര് ഇന്ത്യ വിമാനം പറന്നുയര്ന്ന് നിമിഷങ്ങള്ക്കുള്ളില് തകര്ന്നുവീണത്. ക്യാബിന് ക്രൂ അംഗങ്ങളടക്കം 242 പേരാണ് വിമാനത്തിലുണ്ടായിരുന്നത്. ഇതില് ഒരാളെ മാത്രമാണ് ജീവനോടെ കണ്ടെത്തിയത്. വിമാനത്താവളത്തിന് സമീപമുള്ള ബിജെ മെഡിക്കല് കോളേജിന്റെ ഹോസ്റ്റല് കെട്ടിടത്തിലേക്കാണ് വിമാനം തകര്ന്നു വീണത്. പ്രദേശവാസികളും വിമാനം വീണ് തകര്ന്ന മെഡിക്കല് കോളേജ് ഹോസ്റ്റല് കെട്ടിടത്തിലുണ്ടായിരുന്ന മെഡിക്കല് വിദ്യാര്ത്ഥികളും അപകടത്തില് മരിച്ചിരുന്നു.
അതേസമയം ടേക്ക് ഓഫ് സമയത്ത് വിമാനത്തിലെ വൈദ്യുതി വിതരണത്തില് തകരാര് സംഭവിച്ചെന്ന് കണ്ടെത്തിയതായി റിപ്പോര്ട്ടുണ്ടായിരുന്നു. വിമാനത്തിന്റെ പിന്ഭാഗത്തെ പരിശോധനയിലാണ് കണ്ടെത്തല്. പിന്ഭാഗത്തെ ചില യന്ത്രഭാഗങ്ങള് കത്തിയത് വൈദ്യുതി തകരാര് മൂലമുള്ള തീപിടുത്തത്തിലാണോയെന്നും സംശയിക്കുന്നു.
കൂടുതല് വാര്ത്തകള്ക്കും തൊഴിലവസരങ്ങള്ക്കും ഗള്ഫ് വാര്ത്തകള് ഗ്രൂപ്പില് ജോയിന് ചെയ്യുക – https://chat.whatsapp.com/DEUubIBAkhI9HFrIvyQtal
വാട്സ്ആപ്പ് ചാനല് ലിങ്ക്- https://whatsapp.com/channel/0029VagTUieB4hdXiUEnVF1K
