തിരുവനന്തപുരം: മലയാളികളായ പ്രവാസികള്ക്കും കുടുംബങ്ങള്ക്കുമായി സംസ്ഥാന സര്ക്കാര് നോര്ക്ക റൂട്സ് വഴി നടപ്പാക്കുന്ന സമഗ്ര ആരോഗ്യ അപകട ഇന്ഷുറന്സ് പദ്ധതിയായ നോര്ക്ക കെയര് കേരളപ്പിറവി ദിനത്തില് നിലവില് വന്നു. ഒരു ലക്ഷത്തി രണ്ടായിരത്തി അഞ്ഞൂറ്റി ഇരുപത്തി നാല് പ്രവാസി കേരളീയ കുടുംബങ്ങള് ഇതുവരെ പദ്ധതിയില് എന്റോള് ചെയ്തിട്ടുണ്ട്. ഇതിലൂടെ ഏകദേശം നാല് ലക്ഷത്തിന് മുകളില് പ്രവാസി കേരളീയ കുടുംബാംഗങ്ങള്ക്ക് ഇന്ഷുറന്സ് പരിരക്ഷ ലഭിക്കും. പദ്ധതിയുടെ ഔദ്യോഗിക ഇന്ഷുറന്സ് സര്ട്ടിഫിക്കറ്റ് തിരുവനന്തപുരത്ത് മുഖ്യമന്ത്രി പിണറായി വിജയന്റെ സാന്നിധ്യത്തില് ന്യൂ ഇന്ത്യ അഷുറന്സ് ഡി ജി എം ജോയ്സ് സതീഷ് നോര്ക്ക റൂട്സ് സി ഇ ഓ അജിത് കൊളശ്ശേരിക്ക് കൈമാറി.
നോര്ക്ക കെയര് പദ്ധതിയില് ചേരുന്നതിനുള്ള സമയപരിധി ഇന്നലെ അവസാനിച്ചുവെങ്കിലും സമയം നീട്ടി നല്കണമെന്ന് പ്രവാസികളില് നിന്നും, പ്രവാസി സംഘടനകളില് നിന്നും ആവശ്യം ഉയര്ന്ന സാഹചര്യത്തില് സമയപരിധി 2025 നവംബര് 30 വരെ ദീര്ഘിപ്പിച്ചതായി നോര്ക്ക റൂട്സ് സി ഇ ഓ അജിത് കൊളശ്ശേരിയും നോര്ക്ക റൂട്സ് റസിഡന്റ് വൈസ് ചെയര്മാന് പി ശ്രീരാമകൃഷ്ണനും അറിയിച്ചു.
സാധുവായ നോര്ക്ക പ്രവാസി ഐ.ഡി, സ്റ്റുഡന്റ് ഐ.ഡി. എന്.ആര്.കെ ഐ.ഡി കാര്ഡുളള പ്രവാസി കേരളീയര്ക്കാണ് പദ്ധതിയില് എന്റോള് ചെയ്യാനാകുക. ഈ കാലയളവിനുള്ളില് രണ്ട് ലക്ഷത്തോളം പ്രവാസികേരളീയര് പുതുതായി നോര്ക്ക പ്രവാസി ഐ.ഡി കാര്ഡ് സേവനവും പ്രയോജനപ്പെടുത്തി. ഒരു കുടുംബത്തിന് (ഭര്ത്താവ്, ഭാര്യ, 25 വയസ്സില് താഴെയുളള രണ്ടു കുട്ടികള്) 13,411 പ്രീമിയത്തില് (അധികമായി ഒരു കുട്ടി (25 വയസ്സില് താഴെ): 4,130) അഞ്ച് ലക്ഷം രൂപയുടെ ആരോഗ്യ ഇന്ഷുറന്സും 10 ലക്ഷം രൂപയുടെ ഗ്രൂപ്പ് പേഴ്സണല് അപകട ഇന്ഷുറന്സ് പരിരക്ഷയും ഉറപ്പാക്കുന്നതാണ് നോര്ക്ക കെയര് പദ്ധതി. വ്യക്തിഗത ഇന്ഷുറന്സിന് (1870 വയസ്സ്) 8,101 രൂപയുമാണ്. നിലവില് കേരളത്തിലെ 500 ലധികം ആശുപത്രികള് ഉള്പ്പെടെ രാജ്യത്തെ 18, 000 ത്തോളം ആശുപത്രികള് വഴി പ്രവാസികേരളീയര്ക്ക് ക്യാഷ്ലെസ്സ് ചികിത്സ ഉറപ്പാക്കുന്നതാണ് പദ്ധതി.
കൂടുതല് വാര്ത്തകള്ക്കും തൊഴിലവസരങ്ങള്ക്കും ഗള്ഫ് മലയാളി വാര്ത്താ ഗ്രൂപ്പില് ജോയിന് ചെയ്യുക – https://chat.whatsapp.com/DEUubIBAkhI9HFrIvyQtal
വാട്സ്ആപ്പ് ചാനല് ലിങ്ക്- https://whatsapp.com/channel/0029VagTUieB4hdXiUEnVF1K
