ഇടുക്കി: ലൗ ജിഹാദ് പരാമര്ശത്തില് ബിജെപി നേതാവ് പി സി ജോര്ജിനെതിരെ യൂത്ത് കോണ്ഗ്രസ് പോലീസില് പരാതി നല്കി. യൂത്ത് കോണ്ഗ്രസ് തൊടുപുഴ നിയോജക മണ്ഡലം പ്രസിഡന്റ് ബിലാല് സമദാണ് തൊടുപുഴ പോലീസില് പരാതി നല്കിയത്. കേരളത്തില് ഒരു കേസ് പോലും ലൗ ജിഹാദിന്റെ പേരില് രജിസ്റ്റര് ചെയ്തിട്ടില്ല. പി സി ജോര്ജ് നടത്തുന്നത് കള്ള പ്രചരണമാണെന്നും പരാതിയില് പറയുന്നു.
കേരളത്തില് ലൗ ജിഹാദ് വര്ദ്ധിക്കുന്നുവെന്നായിരുന്നു പി സി ജോര്ജിന്റെ പ്രസ്താവന. മീനച്ചില് താലൂക്കില് മാത്രം 400 പെണ്കുട്ടികളെ ലൗ ജിഹാദിലൂടെ നഷ്ടപ്പെട്ടു. 41 പേരെ മാത്രമാണ് തിരികെ കിട്ടിയത്. ക്രിസ്ത്യാനികള് 24 വയസിന് മുമ്പ് പെണ്കുട്ടികളെ കല്യാണം കഴിപ്പിക്കാന് തയ്യാറാകണം. യാഥാര്ത്ഥ്യം മനസിലാക്കി രക്ഷിതാക്കള് പെരുമാറണമെന്നും പി സി ജോര്ജ് പ്രസംഗിച്ചിരുന്നു. കഴിഞ്ഞ ദിവസം ഈരാറ്റുപേട്ടയില് പിടികൂടിയ സ്ഫോടക വസ്തുക്കള് കേരളം മുഴുവന് കത്തിക്കാനുള്ളതുണ്ട്. അത് എവിടെ കത്തിക്കാന് ആണെന്നും അറിയാം, പക്ഷേ പറയുന്നില്ല. രാജ്യത്തിന്റെ പോക്ക് അപകടകരമായ നിലയിലാണെന്നും പി സി ജോര്ജ് പറഞ്ഞു. പാലായില് നടന്ന ലഹരി വിരുദ്ധ പരിപാടിയില് പ്രസംഗിക്കുന്നതിനിടെയായിരുന്നു പി സി ജോര്ജിന്റെ പരാമര്ശം.
മതവിദ്വേഷ പരാമര്ശ കേസില് ജാമ്യത്തില് കഴിയുന്ന പിസി ജോര്ജ്, കോടതിയുടെ കര്ശന നിര്ദേശം നിലനില്ക്കെയാണ് വീണ്ടും വിവാദ പ്രസംഗം നടത്തിയത്. ഇക്കഴിഞ്ഞ ജനുവരി ആറിന് ഒരു ചാനല് ചര്ച്ചയില് പി സി ജോര്ജ് നടത്തിയ പരാമര്ശത്തിനെതിരെ ഈരാറ്റുപേട്ട പോലീസ് കേസെടുത്തിരുന്നു.
കൂടുതല് വാര്ത്തകള്ക്കും തൊഴില് അവസരങ്ങള്ക്കും ഗള്ഫ് വാര്ത്തകള് ഗ്രൂപ്പില് ജോയിന് ചെയ്യുക- https://chat.whatsapp.com/Iz8594zylUiGUCaltFYrr7
ഗള്ഫ് വാര്ത്തകള് വാട്സ്ആപ്പ് ചാനല് ലിങ്ക്- https://whatsapp.com/channel/0029VagTUieB4hdXiUEnVF1K
