ഹൈദരാബാദ്: തെലങ്കാനയില് നിര്മാണത്തിലിരുന്ന തുരങ്കത്തിന്റെ ഒരുഭാഗം തകര്ന്നുവീണു. ഏഴ് തൊഴിലാളികള് തുരങ്കത്തിനുള്ളില് കുടുങ്ങിയതായി ദേശീയ മാധ്യമങ്ങള് റിപ്പോര്ട്ട് ചെയ്തു. നാഗര്കുര്ണൂല് ജില്ലയിലെ ശ്രീശൈലം ഡാമിന് പിന്നിലുള്ള തുരങ്കമാണ് തകര്ന്നത്. തുരങ്കത്തിന്റെ ഒരു ഭാഗത്തുണ്ടായ ചോര്ച്ച പരിഹരിക്കാന് തൊഴിലാളികള് അകത്ത് കയറിയപ്പോഴാണ് അപകടം സംഭവിച്ചത്. തുരങ്കത്തില് 14 കിലോമീറ്ററോളാം ഉള്ളിലാണ് അപകടം നടന്നതെന്നാണ് വിവരം.
തുരങ്കത്തിന്റെ മുകള് ഭാഗത്ത് നിന്നും മൂന്ന് മീറ്ററോളം ഇടിഞ്ഞ് വീണതായാണ് റിപ്പോര്ട്ടുകള്. ജില്ലാ കളക്ടര്, എസ്പി, ഫയര്ഫോഴ്സ്, ജലസേചന വകുപ്പ് ഉദ്യോഗസ്ഥര് എന്നിവര് ഉടന് സ്ഥലത്തെത്തി ദുരിതാശ്വാസ നടപടികള് സ്വീകരിക്കാന് മുഖ്യമന്ത്രി രേവന്ത് റെഡ്ഡി നിര്ദ്ദേശം നല്കിയിട്ടുണ്ട്. മൂന്നുപേരെ രക്ഷപ്പെടുത്തിയതായും ഏഴോളം തൊഴിലാളികള് ഉള്ളില് കുടുങ്ങി കിടക്കുന്നതായും പൊലീസിനെ ഉദ്ധരിച്ച് എന്ടിവി റിപ്പോര്ട്ട് ചെയ്തു. രക്ഷാപ്രവര്ത്തനം പുരോഗമിക്കുകയാണ്. നാഗര്കുര്ണൂല് ജില്ലയിലെ അംറബാദിലാണ് തുരങ്കം സ്ഥിതി ചെയ്യുന്നത്. നിര്മാണപ്രവര്ത്തനങ്ങളെ തുടര്ന്ന് അടച്ചിട്ടിരിക്കുകയായിരുന്ന തുരങ്കം നാലുദിവസം മുമ്പാണ് തുറന്നത്.
കൂടുതല് വാര്ത്തകള്ക്കും തൊഴില് അവസരങ്ങള്ക്കും ഗള്ഫ് വാര്ത്തകള് ഗ്രൂപ്പില് ജോയിന് ചെയ്യുക- https://chat.whatsapp.com/Iz8594zylUiGUCaltFYrr7
ഗള്ഫ് വാര്ത്തകള് വാട്സ്ആപ്പ് ചാനല് ലിങ്ക്- https://whatsapp.com/channel/0029VagTUieB4hdXiUEnVF1K
