കുവൈറ്റ് സിറ്റി : കുവൈറ്റിൽ സർക്കാർ ഡോക്ടർമാർക്ക് ഔദ്യോഗിക ജോലികൾക്ക് ശേഷം സ്വകാര്യ ക്ലിനിക്കുകളിൽ ജോലി ചെയ്യാൻ അനുമതി. കുവൈത്ത് ആരോഗ്യ മന്ത്രാലയം ഇത് സംബന്ധിച്ച ഉത്തരവ് പുറപ്പെടുവിച്ചു. അതേസമയം യോഗ്യരായ ഡോക്ടർമാർ സ്വകാര്യ ആശുപത്രികളിൽ നേതൃത്വമോ സൂപ്പർവൈസറി സ്ഥാനമോ വഹിക്കരുത്. രാജ്യത്തെ സർക്കാർ മെഡിക്കൽ മേഖലയിലെ സ്പെഷ്യലിസ്റ്റ് ഡോക്ടർമാർക്കും മുതിർന്ന മെഡിക്കൽ പ്രൊഫഷണലുകൾക്കും സ്വകാര്യ ക്ലിനിക്കുകളിലോ മറ്റ് സൗകര്യങ്ങളിലോ അനൗദ്യോഗിക ജോലി സമയങ്ങളിൽ ജോലി ചെയ്യാൻ അനുമതി നൽകിയാണ് ആരോഗ്യ മന്ത്രാലയം ഉത്തരവ് പുറപ്പെടുവിച്ചത്.
മന്ത്രാലയം നിശ്ചയിച്ചിട്ടുള്ള നിർദ്ദിഷ്ട വ്യവസ്ഥകൾക്കും ചട്ടങ്ങൾക്കും വിധേയമാണ് അനുമതി നൽകുക. മന്ത്രാലയത്തിൻ്റെ നിർദ്ദേശപ്രകാരം, യോഗ്യരായ ഡോക്ടർമാർ സ്വകാര്യ മെഡിക്കൽ മേഖലകളിൽ നേതൃത്വമോ സൂപ്പർവൈസറി സ്ഥാനങ്ങളോ വഹിക്കരുത്. മികച്ച ഗ്രേഡ്, മന്ത്രാലയത്തിൻ്റെ അണ്ടർസെക്രട്ടറി, അസിസ്റ്റൻ്റ് അണ്ടർസെക്രട്ടറി, വകുപ്പുകളുടെ ഡയറക്ടർമാർ, സ്വകാര്യ മെഡിക്കൽ മേഖലയിലെ മറ്റ് അനുബന്ധ സൂപ്പർവൈസറി റോളുകൾ എന്നിവ വഹിക്കുന്നതിനാണ് നിയന്ത്രണമുള്ളത്.
