തൃശ്ശൂര്: തൃശൂരില് ലുലു മാള് നിര്മാണം വൈകുന്നതിന് പിന്നില് ഒരു രാഷ്ട്രീയപാര്ട്ടിയുടെ ഇടപെടലാണെന്ന് കഴിഞ്ഞ ദിവസം എംഎ യൂസഫലി പറഞ്ഞിരുന്നു. സിപിഐ നേതാവ് ടിഎന് മുകുന്ദനാണ് പരാതിക്കാരന്. നെല്വയല് പരിവര്ത്തനപ്പെടുത്തിയതിനെതിരെയാണ് പരാതി നല്കിയതെന്ന് സിപിഐ മുന് ലോക്കല് സെക്രട്ടറിയായിരുന്ന ടിഎന് മുകുന്ദന് പറഞ്ഞു. തന്റെ പരാതി വ്യക്തിപരമാണെന്നും അദ്ദേഹം വ്യക്തമാക്കി.
പുഴയ്ക്കലിലെ ഹയാത്ത് റീജന്സിയോട് ചേര്ന്ന ഒരേക്കറോളം വരുന്ന സ്ഥലമാണ് ലുലുവിനായി കണ്ടെത്തിരുന്നത്. ചിരിയങ്കണ്ടത്ത് കാരുടെ ഉടമസ്ഥലയിലായിരുന്നു ഈ സ്ഥലം ഉണ്ടായിരുന്നത്. പന്നിക്കര കിണി പാടശേഖരത്തിലുള്പ്പെടുന്നതായിരുന്നു ഇത്. ജിയോളജിസ്റ്റിന്റെ അനുമതിയോടെ ഉടമകള് കളിമണ്ണ് നീക്കം ചെയ്യാന് തുടങ്ങിയതോടെയാണ് സിപിഐ നേതാവായ മുകുന്ദന്റെ പരാതിയുടെ തുടക്കം.
പരാതിയെത്തുടര്ന്ന് ജിയോളജിസ്റ്റിന്റെ പെര്മിറ്റ് റദ്ദാക്കി. സ്ഥലം ഉടമകള് ഭൂമി പരിവര്ത്തനം ചെയ്യുന്നതിന് ആര്ഡിഒയ്ക്ക് അപേക്ഷ നല്കിയെങ്കിലും നിരസിക്കപ്പെട്ടു. ലാന്റ് റവന്യൂ കമ്മീഷണര്ക്ക് അപ്പീല് പോയെങ്കിലും അംഗീകരിക്കപ്പെട്ടില്ല.
ഈ ഘട്ടത്തിലാണ് ഭൂമി ലുലു വാങ്ങുന്നത്. മതിലു കെട്ടുകയും കുളം കുഴിക്കുകയും ചെയ്തതോടെ വില്ലേജ് ഓഫീസര്, കൃഷി ഓഫീസര് എന്നിവര്ക്ക് മുന്നില് മുകുന്ദന് പരാതിയുമായെത്തി. പിന്നാലെ സ്റ്റോപ്പ് മെമ്മോ. പിന്നാലെ ലുലുവിന്റെ അപേക്ഷയില് ആദ്യം ഡാറ്റാബാങ്കില് നിന്നും പിന്നീട് ഭൂമി തരംമാറ്റിയും നല്കി. തരം മാറ്റുന്നതിന് എട്ടുകോടി എണ്പത് ലക്ഷം നിയമാനുസൃത ഫീസ് സര്ക്കാരില് അടയ്ക്കുകയും ചെയ്തു. ഭൂമി പരിവര്ത്തനം സംബന്ധിച്ച പരാതി ജില്ലാ കളക്ടറുടെ മുന്നിലുണ്ടായിരുന്നു. കളക്ടര് ഹിയറിങ്ങ് വിളിച്ചതോടെ അതിനെ ലുലു ഗ്രൂപ്പ് ഹൈക്കോടതിയില് ചലഞ്ച് ചെയ്തു. കേസില് മുകുന്ദനും കക്ഷി ചേര്ന്നു. ഹൈക്കോടതി നിര്ദ്ദേശ പ്രകാരം കളക്ടര് ആര്ഡിഒയില് നിന്നും കൃഷി ഓഫീസറില് നിന്നും തല്സ്ഥിതി റിപ്പോര്ട്ട് തേടി കോടതിയില് സമര്പ്പിച്ചിട്ടുണ്ട്.
കേസിന്റെ വിസ്താരം പൂര്ത്തിയായി ഉത്തരവിനായി കാത്തിരിക്കുമ്പോഴാണ് യൂസഫലിയുടെ കഴിഞ്ഞദിവസത്തെ പ്രസ്താവന പുറത്തുവന്നത്.
കൂടുതല് വാര്ത്തകള്ക്കും തൊഴിലവസരങ്ങള്ക്കും ഗള്ഫ് മലയാളി വാര്ത്താ ഗ്രൂപ്പില് ജോയിന് ചെയ്യുക – https://chat.whatsapp.com/DEUubIBAkhI9HFrIvyQtal
വാട്സ്ആപ്പ് ചാനല് ലിങ്ക്- https://whatsapp.com/channel/0029VagTUieB4hdXiUEnVF1K
