ഡല്ഹി: ജമ്മുകാശ്മീര് പഹല്ഗാമില് 26 നിരപരാധികളെ കൊലപ്പെടുത്തിയ ഭീകരരുടെ ചിത്രം അന്വേഷണ സംഘം പുറത്ത് വിട്ടു. നാല് ഭീകരരുടെ രേഖാചിത്രമാണ് പുറത്ത് വിട്ടത്. ഇവരെക്കുറിച്ച് എന്തെങ്കിലും വിവരം അറിയുന്നവര് പൊലീസിനെ അറിയിക്കണമെന്നും അന്വേഷണ സംഘം അഭ്യര്ത്ഥിച്ചു. രണ്ട് പ്രദേശവാസികള് അടക്കം ആറ് ഭീകരരാണ് വിനോദ സഞ്ചാരികള്ക്ക് നേരെ വെടി ഉതിര്ത്തത് എന്നാണ് വിവരം. കൂട്ടക്കൊലയ്ക്ക് ശേഷം രക്ഷപ്പെട്ട തീവ്രവാദികള്ക്കായി തെരച്ചില് ഊര്ജ്ജിതമാക്കിയിരിക്കുകയാണ്. പഹല്ഗാം, ബൈസരണ്, അനന്ത് നാഗ് എന്നീ മേഖലകളിലായി വിശദമായ പരിശോധന നടക്കുകയാണ്.
പഹല്ഗാം ആക്രമണത്തിന് പിന്നിലെ സൂത്രധാരന് ലഷ്ക്കര് ഇ ത്വയ്ബയുടെ കൊടും ഭീകരന് സൈഫുള്ള കസൂരിയെന്ന് വിവരം. പാകിസ്ഥാനിലിരുന്നാണ് കസൂരി ആക്രമണം നിയന്ത്രിച്ചതെന്നുമാണ് രഹസ്യാന്വേഷണ വിവരം. കാശ്മീരില് പോയി ഭീകര പരിശീലനം നേടിയവരാണ് ആക്രമണം നടത്തിയത് എന്നാണ് വിവരം. പാകിസ്ഥാന് ആസ്ഥാനമായി പ്രവര്ത്തിക്കുന്ന ഭീകരസംഘടനയായ ലഷ്ക്കര് ഇ തൊയ്ബയുടെ ഉപമേധാവിയാണ് ഇയാള്. കൊടുംഭീകരനായ ഹഫീസ് സെയ്ദുമായി അടുത്ത ബന്ധം പുലര്ത്തുന്ന കസൂരി ലഷ്ക്കറിന്റെ പ്രാദേശിക സംഘടനയായ റെസിസ്റ്റന്സ് ഫ്രണ്ടുമായി സഹകരിച്ച് ആക്രമണം നടത്തിയെന്നാണ് അന്വേഷണ ഏജന്സികളുടെ നിഗമനം.
വിനോദ സഞ്ചാരികളെ വെടിവെച്ചുകൊന്ന ഭീകര സംഘത്തില് ആറ് പേരാണ് ഉണ്ടായിരുന്നത്. ഇതില് രണ്ട് പ്രാദേശിക ഭീകരരാണ്. ഇവരെ തിരിച്ചറിഞ്ഞിട്ടുണ്ട്. സംഘത്തില് അഫ്ഗാന് ഭാഷയായ പഷ്തോ സംസാരിക്കുന്നവരുമുണ്ടായിരുന്നുവെന്നും അന്വേഷണ സംഘം പറയുന്നു. ഭീകരര്ക്കായി ബയ്സരണ് വനമേഖലയില് നാല് ഹെലികോപ്റ്ററുകളില് സൈന്യം തെരച്ചില് നടത്തിയെങ്കിലും സംശയകരമായി ഒന്നും കണ്ടെത്താനായില്ല. അതേസമയം, ആക്രമണവുമായി ബന്ധമില്ലെന്ന് പാകിസ്ഥാന് പ്രതികരിച്ചു.
ജമ്മു കശ്മീരിലെ പഹല്ഗാമില് ഇന്നലെയുണ്ടായ ഭീകരാക്രമണം 15 മിനിറ്റ് നീണ്ടുനിന്നെന്ന് സ്ഥിരീകരണം. നാല് ഭീകരരാണ് ആക്രമണം നടത്തിയത്. ഇവരില് രണ്ട് പേര് കശ്മീരികളും രണ്ട് പേര് പാക്കിസ്ഥാനിലെ പഖ്തൂണ് വംശജരുമാണ്. ഭീകരര് ക്യാമറയുമായാണ് വന്നതെന്നും സ്റ്റീല് ബുള്ളറ്റുകളാണ് ആക്രമണത്തിന് ഉപയോഗിച്ചതെന്നും സ്ഥിരീകരിച്ചു. ഭീകരര് പകര്ത്തിയ ദൃശ്യങ്ങള് പ്രചരിക്കാതിരിക്കാന് മുന്കരുതല് സ്വീകരിക്കുമെന്ന് ഏജന്സികള് വ്യക്തമാക്കി.
കൂടുതല് വാര്ത്തകള്ക്കും തൊഴില് അവസരങ്ങള്ക്കും ഗള്ഫ് വാര്ത്തകള് ഗ്രൂപ്പില് ജോയിന് ചെയ്യുക- https://chat.whatsapp.com/Iz8594zylUiGUCaltFYrr7
ഗള്ഫ് വാര്ത്തകള് വാട്സ്ആപ്പ് ചാനല് ലിങ്ക്- https://whatsapp.com/channel/0029VagTUieB4hdXiUEnVF1K
