ദോഹ: ഖത്തറിൽ ലൈസൻസില്ലാത്ത പെപ്റ്റൈഡ് ഉൽപ്പന്നങ്ങൾ കൈകാര്യം ചെയ്യൽ, വിതരണം, ഉപയോഗം, പ്രചാരണം എന്നിവയ്ക്ക് നിരോധനം. ലൈസൻസില്ലാത്ത ഉൽപ്പന്നങ്ങളുടെ വില്പനയും ഉപയോഗവും നിരോധിച്ച് ഖത്തർ പൊതുജനാരോഗ്യ മന്ത്രാലയത്തിന് കീഴിലുള്ള ഫാർമസി ആൻഡ് ഡ്രഗ് കൺട്രോൾ വിഭാഗം സർക്കുലർ പുറപ്പെടുവിച്ചു. BPC-157, Retatrutide, MOTS-c തുടങ്ങിയ ലൈസൻസില്ലാത്ത നിരവധി പെപ്റ്റൈഡുകളുടെ പ്രചാരണം, കൈകാര്യം ചെയ്യൽ, വിതരണം എന്നിവയിൽ വർദ്ധനവ് ശ്രദ്ധയിൽപ്പെട്ടതിനെ തുടർന്നാണ് നടപടി എന്നും വകുപ്പ് പ്രസ്താവനയിൽ വ്യക്തമാക്കി. ഇത്തരം ഉൽപ്പന്നങ്ങൾ കുത്തിവയ്പ്പിനുള്ളവ ഉൾപ്പെടെ വിവിധ രൂപങ്ങളിൽ വിപണനം ചെയ്യപ്പെടുന്നുണ്ട്. ഉപയോഗത്തിന് ഔദ്യോഗിക അനുമതിയില്ലാതിരിക്കെത്തന്നെ, ചികിത്സാപരമായോ സൗന്ദര്യവർദ്ധകമായോ ശാരീരിക പ്രകടനം മെച്ചപ്പെടുത്തുന്നതിനായോ ഉള്ള ഗുണങ്ങൾ അവകാശപ്പെട്ടാണ് ഇവ പ്രചരിപ്പിക്കപ്പെടുന്നതെന്നും അതോറിറ്റി വ്യക്തമാക്കി.
ഇത്തരം ലൈസൻസ് ഇല്ലാത്ത ഉൽപ്പന്നങ്ങൾ ഖത്തറിലെ ഫാർമസി ആൻഡ് ഡ്രഗ് കൺട്രോൾ വകുപ്പ് മനുഷ്യരിലെ ചികിത്സാ ആവശ്യങ്ങൾക്കായി അംഗീകരിച്ചിട്ടുള്ള മരുന്നുകളല്ലെന്നും മന്ത്രാലയം പ്രത്യേകം എടുത്തുപറഞ്ഞു. സുരക്ഷിതത്വമോ ഫലപ്രാപ്തിയോ തെളിയിക്കപ്പെട്ടിട്ടില്ലെന്നും, ഉപയോഗം രോഗികളുടെ സുരക്ഷയെ ബാധിച്ചേക്കാവുന്ന ആരോഗ്യപരമായ അപകടസാധ്യതകൾക്ക് കാരണമായേക്കാമെന്നും മന്ത്രാലയം വ്യക്തമാക്കി. കൂടാതെ, ഫാർമസി ആൻഡ് ഡ്രഗ് കൺട്രോൾ വകുപ്പിന്റെ ലൈസൻസില്ലാത്ത ഏതൊരു പെപ്റ്റൈഡ് (peptide) ഉൽപ്പന്നത്തിന്റെയും ഇറക്കുമതി, ഉൽപ്പാദനം, നിർമ്മാണം, വ്യാപാരം, നിർദ്ദേശിക്കൽ (prescribing), വിതരണം, കുത്തിവയ്പ്പ്, ഉപയോഗം, പരസ്യം ചെയ്യൽ അല്ലെങ്കിൽ പ്രചാരണം എന്നിവ സോഷ്യൽ മീഡിയയും ഓൺലൈൻ പ്ലാറ്റ്ഫോമുകളും ഉൾപ്പെടെ ഏത് രൂപത്തിലോ മാർഗ്ഗത്തിലോ ചെയ്യുന്നതും നിരോധിച്ചിരിക്കുന്നു.
“ഗവേഷണ ആവശ്യങ്ങൾക്ക്” അല്ലെങ്കിൽ “മനുഷ്യ ഉപയോഗത്തിനല്ല” തുടങ്ങിയ ലേബലുകളിൽ വിപണനം ചെയ്യപ്പെടുന്ന ഉൽപ്പന്നങ്ങൾ മനുഷ്യ ഉപയോഗത്തിനായി ഉപയോഗിക്കുകയോ പ്രചരിപ്പിക്കുകയോ ചെയ്യുന്ന സാഹചര്യത്തിലും ഈ നിരോധനം ബാധകമാണ്. നിയമലംഘകർക്കെതിരെ ഫാർമസി ആൻഡ് ഡ്രഗ് കൺട്രോൾ വകുപ്പ് ആവശ്യമായ എല്ലാ നിയന്ത്രണ-നിയമ നടപടികളും സ്വീകരിക്കുമെന്നും അതോറിറ്റി ചൂണ്ടിക്കാട്ടി.
കൂടുതൽ വാർത്തകൾക്കും തൊഴിലവസരങ്ങൾക്കും ഗൾഫ് മലയാളി വാർത്താ ഗ്രൂപ്പിൽ ജോയിൻ ചെയ്യുക –https://chat.whatsapp.com/BEtoiocklOc8D5XDkdaHoR?mode=hq2tcla
വാട്സ്ആപ്പ് ചാനൽ ലിങ്ക്-https://whatsapp.com/channel/0029VagTUieB4hdXiUEnVF1K
