കൊച്ചി: നടി നവ്യാ നായര്ക്ക് ഒന്നേകാല് ലക്ഷം രൂപ പിഴ. മുല്ലപ്പൂവ് കൈവശം വച്ചതിനാണ് പിഴ. പിഴയുടെ വിവരം നവ്യ നായര് തന്നെയാണ് തുറന്നുപറഞ്ഞത്. ഓസ്ട്രേലിയയിലെ മെല്ബണ് രാജ്യാന്തര വിമാനത്താവളത്തിലാണ് നടിയുടെ കയ്യില് നിന്ന് പിഴ ഈടാക്കിയത്. വിക്ടോറിയയിലെ മലയാളി അസോസിയേഷന്റെ ഓണപ്പരിപാടിയില് പങ്കെടുക്കാനെത്തിയപ്പോഴാണ് സംഭവം.
ഓണപ്പരിപാടിയില് സംസാരിക്കവെ നവ്യ തനിക്കുണ്ടായ അനുഭവം പങ്കുവച്ചു. 15 സെന്റിമീറ്റര് നീളമുള്ള മുല്ലപ്പൂവാണ് തന്റെ പക്കല് ഉണ്ടായിരുന്നത്. 1,980 ഡോളര് (ഒന്നേകാല് ലക്ഷത്തോളം രൂപ) പിഴ അടയ്ക്കാന് ആവശ്യപ്പെട്ടു. മുല്ലപ്പൂവ് കൊണ്ടുപോകാന് പാടില്ല എന്ന നിയമം തനിക്ക് അറിയില്ലായിരുന്നു എന്നും നവ്യ വ്യക്തമാക്കി.
‘ഇങ്ങോട്ട് വരുന്നതിന് മുമ്പ് അച്ഛനാണ് എനിക്ക് മുല്ലപ്പൂവ് വാങ്ങിത്തന്നത്. രണ്ട് കഷ്ണങ്ങളാക്കി മുറിച്ചാണ് എനിക്ക് തന്നത്. കൊച്ചി മുതല് സിങ്കപ്പൂര് വരെ ഒരു കഷ്ണം മുടിയില് ചൂടാന് അച്ഛന് പറഞ്ഞു. സിങ്കപ്പൂരെത്തുമ്പോഴേക്കും അത് വാടിപ്പോകും. സിങ്കപ്പൂരില് നിന്ന് രണ്ടാമത്തെ കഷ്ണം ചൂടാമെന്നും അത് ഹാന്ഡ്ബാഗില് വെക്കാനും അച്ഛന് പറഞ്ഞു. ഒരു ക്യാരിബാഗിലാക്കി ഞാന് മുല്ലപ്പൂവ് എന്റെ ഹാന്ഡ് ബാഗില് വച്ചു – നവ്യയുടെ വാക്കുകള്
എന്നാല് ഞാന് ചെയ്തത് നിയമവിരുദ്ധമായ കാര്യമായിരുന്നു. അറിയാതെ ചെയ്ത തെറ്റ്. അറിവില്ലായ്മ ഒഴികഴിവല്ല എന്ന് എനിക്കറിയാം. 15 സെന്റിമീറ്റര് മുല്ലപ്പൂ കൊണ്ടുവന്നതിന് അധികൃതര് എന്നോട് 1,980 ഡോളര് (ഒന്നേകാല് ലക്ഷത്തോളം രൂപ) പിഴ അടയ്ക്കാന് ആവശ്യപ്പെട്ടു. തെറ്റ് തെറ്റ് തന്നെയാണ് എന്ന് എനിക്കറിയാം. പക്ഷേ അത് മനഃപൂര്വമായിരുന്നില്ല. 28 ദിവസത്തിനകം പിഴ അടയ്ക്കണമെന്നാണ് അവര് എന്നോട് പറഞ്ഞത്.’ -നവ്യ നായര് പറഞ്ഞു.
കൂടുതല് വാര്ത്തകള്ക്കും തൊഴിലവസരങ്ങള്ക്കും ഗള്ഫ് മലയാളി വാര്ത്താ ഗ്രൂപ്പില് ജോയിന് ചെയ്യുക – https://chat.whatsapp.com/DEUubIBAkhI9HFrIvyQtal
വാട്സ്ആപ്പ് ചാനല് ലിങ്ക്- https://whatsapp.com/channel/0029VagTUieB4hdXiUEnVF1K
