ദോഹ: ഖത്തറിൽ ദേശീയ പേയ്‌മെന്റ് സംവിധാനമായ ‘ഹിമ്യാൻ’ (Hemyan) കാർഡ് സാംസങ് വാലറ്റുമായി (Samsung Wallet) സംയോജിപ്പിക്കുന്നു. സാംസങ് ഗൾഫ് ഇലക്ട്രോണിക്സുമായി സഹകരിച്ചാണ് നടപടിയെന്നും ഖത്തർ സെൻട്രൽ ബാങ്ക് പ്രഖ്യാപിച്ചു. ഇനിമുതൽ യോഗ്യരായ ഹിമ്യാൻ കാർഡ് ഉടമകൾക്ക് അനുയോജ്യമായ ഗാലക്സി സ്മാർട്ട്ഫോണുകളിലൂടെയും സ്മാർട്ട്‌ വാച്ചുകളിലൂടെയും നേരിട്ട് സുരക്ഷിതവും വേഗത്തിലുള്ളതുമായ കോൺടാക്റ്റ്‌ലെസ് പേയ്‌മെന്റുകൾ നടത്താൻ സാധിക്കും. സുരക്ഷിതവും കാര്യക്ഷമവും പ്രാദേശികമായി നിയന്ത്രിക്കപ്പെടുന്നതുമായ ഡിജിറ്റൽ ഇടപാടുകൾ പ്രോത്സാഹിപ്പിക്കുക എന്ന ലക്ഷ്യത്തോടെയാണ് , ഖത്തറിലെ ആദ്യത്തെ ദേശീയ പേയ്‌മെന്റ് കാർഡ് ബ്രാൻഡ് എന്ന നിലയിൽ ‘ഹിമ്യാൻ’ സംവിധാനം വികസിപ്പിച്ചതെന്നും ഖത്തർ സെൻട്രൽ ബാങ്ക് വ്യക്തമാക്കി.
നിശ്ചയിച്ചിട്ടുള്ള ഡെബിറ്റ്, പ്രീപെയ്ഡ് കാർഡുകൾ ചേർത്ത് സാംസങ് വാലറ്റ് (Samsung Wallet) ഉപയോഗിക്കുന്നവർക്ക് മൊബൈൽ പേയ്‌മെന്റുകളുടെ സൗകര്യം പൂർണ്ണമായി പ്രയോജനപ്പെടുത്താം. ഇതിലൂടെ ഭൗതിക കാർഡുകൾ കൈവശം വെക്കേണ്ട സാഹചര്യം ഒഴിവാകുകയും, രാജ്യത്തുടനീളമുള്ള വിവിധ വിൽപ്പന കേന്ദ്രങ്ങളിലും കടകളിലും വേഗത്തിലും കോൺടാക്റ്റ്‌ലെസ് (contactless) ആയും പണം നൽകാൻ ഉപഭോക്താക്കൾക്ക് സാധിക്കുകയും ചെയ്യും.
സാംസങ് വാലറ്റിൽ (Samsung Wallet) ഹിമ്യാൻ (Hemyan) കാർഡ് ചേർക്കുന്നതിനായി, ഗാലക്സി ഫോണിൽ ഉപകരണത്തിൽ ഡിജിറ്റൽ വാലറ്റ് ആപ്ലിക്കേഷൻ തുറന്ന്, പുതിയ കാർഡ് ചേർക്കാനുള്ള ഓപ്ഷൻ തിരഞ്ഞെടുത്ത്, തുടർന്ന് കാർഡ് നൽകുന്ന ബാങ്ക് വഴിയുള്ള വേഗത്തിലുള്ള പരിശോധനാ നടപടിക്രമം പൂർത്തിയാക്കിയാൽ മതിയെന്നും ഖത്തർ സെൻട്രൽ ബാങ്ക് വിശദീകരിച്ചു.
കൂടുതൽ വാർത്തകൾക്കും തൊഴിലവസരങ്ങൾക്കും ഗൾഫ് മലയാളി വാർത്താ ഗ്രൂപ്പിൽ ജോയിൻ ചെയ്യുക –https://chat.whatsapp.com/BEtoiocklOc8D5XDkdaHoR?mode=hq2tcla
വാട്സ്ആപ്പ് ചാനൽ ലിങ്ക്-https://whatsapp.com/channel/0029VagTUieB4hdXiUEnVF1K
