ദോഹ: ഖത്തറില്‍ ഈദ് അല്‍ ഫിത്തര്‍ അവധിക്കാലത്ത് ആരോഗ്യ മേഖലയിലെ പ്രവര്‍ത്തന സമയം പുനഃക്രമീകരിച്ചതായി പൊതുജനാരോഗ്യ മന്ത്രാലയം പ്രഖ്യാപിച്ചു. ഹമദ് മെഡിക്കല്‍ കോര്‍പ്പറേഷന്‍ (എച്ച്എംസി) ആശുപത്രികളിലെ പീഡിയാട്രിക് എമര്‍ജന്‍സി സെന്ററുകള്‍ ഉള്‍പ്പെടെ എല്ലാ അടിയന്തര സേവനങ്ങളും ഇന്‍പേഷ്യന്റ് വിഭാഗങ്ങളും ആഴ്ചയില്‍ 24 മണിക്കൂറും (24/7) പ്രവര്‍ത്തിക്കുമെന്ന് മന്ത്രാലയം വ്യക്തമാക്കി. ആംബുലന്‍സ് സേവനവും 24 മണിക്കൂറും ലഭ്യമാകും.
പിഎച്ച്‌സിസി, പ്രൈമറി ഹെല്‍ത്ത് കെയര്‍ കോര്‍പ്പറേഷന്‍ (PHCC) നടത്തുന്ന 31 ആരോഗ്യ കേന്ദ്രങ്ങളില്‍ 20 എണ്ണം ഈദ് അവധിക്കാലത്ത് പ്രവര്‍ത്തിക്കും. അടിയന്തര ശിശുരോഗ കേസുകള്‍ക്കായി പ്രത്യേകം രൂപകല്‍പ്പന ചെയ്ത ആറ് കേന്ദ്രങ്ങള്‍ ഉള്‍പ്പെടെ 12 ആരോഗ്യ കേന്ദ്രങ്ങളില്‍ 24/7 അടിയന്തര പരിചരണ സേവനങ്ങള്‍ ലഭ്യമാകുമെന്നും മന്ത്രാലയം അറിയിച്ചു.
അവധി ദിവസങ്ങളില്‍ മന്ത്രാലയം നിരവധി സേവന വകുപ്പുകളുടെ പ്രവര്‍ത്തന സമയവും പ്രഖ്യാപിച്ചിട്ടുണ്ട്. ഈദിന്റെ ആദ്യ ദിവസവും വെള്ളി, ശനി ദിവസങ്ങളിലും ഒഴികെ, പൊതുജനാരോഗ്യ മന്ത്രാലയത്തിന്റെ ഔദ്യോഗിക ഓഫീസില്‍ പ്രവര്‍ത്തിക്കുന്ന മെഡിക്കല്‍ റിലേഷന്‍സ് ആന്‍ഡ് ട്രീറ്റ്മെന്റ് അബ്രോഡ് ഡിപ്പാര്‍ട്ട്മെന്റ് രാവിലെ 9 മുതല്‍ ഉച്ചയ്ക്ക് 12 വരെ സന്ദര്‍ശകരെ സ്വീകരിക്കും. വനിതാ വെല്‍നസ് ആന്‍ഡ് റിസര്‍ച്ച് സെന്ററില്‍ (WWRC) സ്ഥിതി ചെയ്യുന്ന മന്ത്രാലയത്തിന്റെ ജനന രജിസ്‌ട്രേഷന്‍ ഓഫീസ്, ഈദിന്റെ ആദ്യ ദിവസവും വെള്ളി, ശനി ദിവസങ്ങളിലും ഒഴികെ, ഈദ് അവധി ദിവസങ്ങളില്‍ രാവിലെ 8 മുതല്‍ ഉച്ചയ്ക്ക് 12 വരെ പ്രവര്‍ത്തിക്കും.
അതേസമയം അവധി ദിവസങ്ങളില്‍ ഹ്യൂമാനിറ്റേറിയന്‍ സേവന ഓഫീസില്‍ പ്രവര്‍ത്തിക്കുന്ന മരണ രജിസ്‌ട്രേഷന്‍ യൂണിറ്റ് പ്രവര്‍ത്തിക്കും. ഖത്തര്‍ ഹെല്‍ത്ത് കെയര്‍ ഏകീകൃത കോണ്‍ടാക്റ്റ് സെന്റര്‍ 16000 24/7 പ്രവര്‍ത്തിക്കുന്നത് തുടരും.
കൂടുതല്‍ വാര്‍ത്തകള്‍ക്കും തൊഴില്‍ അവസരങ്ങള്‍ക്കും ഗള്‍ഫ് വാര്‍ത്തകള്‍ ഗ്രൂപ്പില്‍ ജോയിന്‍ ചെയ്യുക- https://chat.whatsapp.com/Iz8594zylUiGUCaltFYrr7
ഗള്‍ഫ് വാര്‍ത്തകള്‍ വാട്‌സ്ആപ്പ് ചാനല്‍ ലിങ്ക്- https://whatsapp.com/channel/0029VagTUieB4hdXiUEnVF1K
