ദോഹ: ഖത്തറില്‍ മെഡിക്കല്‍ അത്യാഹിതങ്ങള്‍ക്കായി ആംബുലന്‍സ് സേവനം ഉപയോഗിക്കേണ്ട വിധം വ്യക്തമാക്കി എച്ച്എംസി. ശീതകാലം ആരംഭിക്കുന്നതോടെ സീസണല്‍ അണുബാധകള്‍ക്കൊപ്പം ആരോഗ്യ അടിയന്തര സേവനങ്ങളും വര്‍ധിക്കുന്ന സാഹചര്യത്തില്‍ ആംബുലന്‍സ് സേവനങ്ങള്‍ ഉപയോഗപ്പെടുത്താമെന്ന് ഹമദ് മെഡിക്കല്‍ കോര്‍പ്പറേഷന്‍ (എച്ച്എംസി) പൊതുജനങ്ങളെ ഓര്‍മ്മിപ്പിച്ചു.
അടിയന്തര ഘട്ടങ്ങളില്‍ ആംബുലന്‍സ് സേവനത്തിന് 999 എന്ന നമ്പറിലേക്ക് വിളിക്കാം. അതേസമയം ജീവന് ഭീഷണിയല്ലാത്ത സാഹചര്യങ്ങളില്‍ 999 കോളുകളില്‍ ആംബുലന്‍സുകള്‍ വിളിക്കുന്നത് ഒഴിവാക്കുന്നത് നിര്‍ണായകമായ കേസുകളോട് വേഗത്തിലും ഫലപ്രദമായും പ്രതികരിക്കുന്നത് തുടരാന്‍ എച്ച്എംസിയുടെ ആംബുലന്‍സ് സേവനത്തെ അനുവദിക്കുമെന്നും അധികൃതര്‍ വ്യക്തമാക്കി. ജീവന് അപകടകരമായ അവസ്ഥയിലുള്ള ഏതൊരു രോഗിക്കും 24 മണിക്കൂറും വേഗത്തില്‍ പ്രതികരിക്കാന്‍ ആംബുലന്‍സ് ടീമുകള്‍ തയ്യാറാണെന്ന് എച്ച്എംസി ആംബുലന്‍സ് സര്‍വീസിനായുള്ള എമര്‍ജന്‍സി ഹെല്‍ത്ത് കെയര്‍ കോര്‍ഡിനേഷന്‍ അസിസ്റ്റന്റ് എക്‌സിക്യൂട്ടീവ് ഡയറക്ടര്‍ അബ്ദുല്‍ അസീസ് അല്‍യാഫെ പറഞ്ഞു.
പക്ഷാഘാതം, ഹൃദയാഘാതം, റോഡ് ട്രാഫിക് അപകടങ്ങള്‍, കടുത്ത അലര്‍ജി മൂലമുണ്ടാകുന്ന അവസ്ഥകള്‍, പിടുത്തം, നെഞ്ചുവേദന, അബോധാവസ്ഥയിലായ ഗുരുതരമായ രോഗികള്‍ എന്നീ അടിയന്തര അവസ്ഥകളില്‍ ആംബുലന്‍സ് സേവനങ്ങള്‍ ഉപയോഗപ്പെടുത്താം. ജീവന് അപകടപ്പെടുത്തുന്ന ആരോഗ്യപ്രശ്നങ്ങളുള്ള ആളുകള്‍ ആംബുലന്‍സിനായി 999 എന്ന നമ്പറില്‍ വിളിക്കാന്‍ മടിക്കരുതെന്നും അധികൃതര്‍ വ്യക്തമാക്കി.
കൂടുതല്‍ വാര്‍ത്തകള്‍ക്കും തൊഴില്‍ അവസരങ്ങള്‍ക്കും ഗള്‍ഫ് വാര്‍ത്തകള്‍ ഗ്രൂപ്പില്‍ ജോയിന്‍ ചെയ്യുക-
https://chat.whatsapp.com/Iz8594zylUiGUCaltFYrr7
ഗള്‍ഫ് വാര്‍ത്തകള്‍ വാട്‌സ്ആപ്പ് ചാനല്‍ ലിങ്ക്-
https://whatsapp.com/channel/0029VagTUieB4hdXiUEnVF1K
